Guð minn góður

Stórtíðindi

2006-07-21T15:38:00.000Z

Nú hafa þau undur og stórmerki gerst að gólfmottan er að leggjast niður. Þó ekki þannig að allt verði hreinsað út og slíkt heldur hefur nýtt über-blogg verið tekið í notkun og í þetta skipti hefur Jens ákveðið að vera með. Ný og betrumbætt síða segir ekki alveg skilið við mottunafnið þó það hafi verið yfirfært á engilsaxnesku og uppfært í "teppi". Nýja bloggið heitir SPIDERBLANKET og slóðin er http://www.spiderblanket.com. Semsagt, mjög þægilegt og einfalt.

Þar sem þetta nýja blog skarar tæknilega og vitsmunalega fram úr öllum öðrum bloggum sem allir aðrir hafa nokkruntíma gert getur verið að ykkar aumu tölvur séu ekki uppsettar til að meðhöndla það. Það þarf þó ekki að örvænta. Í flestum tilvikum kemur þetta sjálfkrafa eftir að þið ýtið eins og einusinni á "Yes". Ef það gerist ekki er ykkur hollast að smella á hnappinn hér að neðan. Það þarf nýjustu útgáfu af Adobe Flash Player og þarna hafiði hana!

Hér með er þetta blogg því lýst "úti" og Spiderblanket er "inni"

Það er aldeilis..

2006-07-04T02:15:00.000Z

Þetta er ótrúlegt! I feel so smaaaall man..

Er í langþráðu tveggja daga fríi núna eftir erfiða vinnuhelgi þar sem mér tókst meðal annars að fljúga allsvakalega á hausinn um borð í skútu og kasta við það símanum mínum í Reykjavíkurhöfn. Þetta þóttu mikil tilþrif og ég hef núna öðlast viðurnefnið tollvörðurinn fljúgandi hjá flestu frönsku kappsiglingafólki hér á landi. Aðeins nokkrar sýningar eftir.

Í augnablikinu er ég því að glíma við ferns konar tjón.. Fjárhagslegt (síminn), líkamlegt (blá og barin, svört og marin), félagslegt (síminn farinn með öll númerin mín og enginn getur náð í mig fyrr en ég er komin með nýjan) og auðvitað andlegt (Það er mjög erfitt að ætla að þykjast vera virðulegur embættismaður eftir svona sprell).

Lífið er nú samt að fara vel með mig þrátt fyrir allt þetta tjón! Við Jens fórum í sumarbústað á Flúðum í síðustu viku með allri stórfamilíunni og höfðum það notalegt í einu sólinni sem hefur sést í sumar! Við stóðum okkur frábærlega í HÓB-mótinu (Hólmsteins-Ófeigs-Blöndal-mótið) sem þá var haldið og kepptum m.a. í golfi, rauðvínssmökkun, trivial og Singstar. Þess á milli átum við góðan mat, horfðum á HM og lágum í heita pottinum. Ótrúlega vel heppnuð ferð nema fyrir aumingja húðina á okkur sem fékk áfall og sólbrann svona líka hressilega.

Svo lítur út fyrir að ég verði líka í fríi næstu helgi sem er auðvitað alveg brillíant!

Loka þessari færslu með mynd af frændum mínum sem eins og sést eru vatnsstríðshetjur með meiru.

Minning

2006-06-28T23:06:00.000Z

Litli nagbangsinn okkar hann Císeró er dáinn.

Hann var búinn að vera veikur í 2 mánuði áður en við urðum að kveðja hann. Þetta byrjaði með því að hann hætti að geta borðað og fór að léttast mikið og við skoðun sást að tennurnar hans voru allar skakkar og ofvaxnar þannig að hann gat varla kyngt. Fyrst leit út fyrir að hægt væri að bjarga honum með aðgerð og tímabundum matargjöfum svo við gerðum það og gáfum honum barnamat úr sprautum. Císó var ótrúlega duglegur og sætur og var eins og pelabarn á sprautunum nokkrum sinnum á dag í næstum allan þennan tíma.

Aðgerðin virkaði þó ekki eins og vonast var til og að lokum gátum við ekki lagt meira á litla grísinn og ákváðum að senda hann þangað sem allt er fullt af holum, grasi og grísakonum. Við eigum samt eftir að sakna hans þó hann sé pottþétt mjög hamingjusamur að vera kominn aftur í Andesfjöllin.

Vinna/sofa/vinna/sofa

2006-06-14T13:23:00.000Z

Nú er ég á kvöld/næturvöktum og geri nákvæmlega ekkert annað en að vinna og sofa.. Ég hitti varla neinn mann nema þá sem ég er að vinna með nema í gær þegar mamma bauð mér í pizzu í hádeginu. Very nice! Jens er sofnaður þegar ég kem heim og ég er sofandi þegar Jens fer í sína vinnu. Fjörugt ástarlíf þar á ferð! Dagarnir eru mislangir hjá mér þó.. stundum kemst ég heim rétt eftir miðnætti en oft er ég á skríða upp í rúm á svipuðum tíma og þegar vekjaraklukkan hjá Jensa byrjar að hringja. Svo sef ég og sef alveg þangað til ég þarf að mæta í vinnuna aftur næsta kvöld. Næ kannski að fara í sturtu ef ég er dugleg. Kvöldvaktirnar líða samt miklu hraðar heldur en dagvaktirnar sem er kostur en ég er fegin að vera bara á þessum vöktum einu sinni í mánuði því maður verður alveg félagslega einangraður. Ég er greinilega algjör félagsfíkill. Pant ekki vera næturvörður!

Jens bauð mér svo á Roger Waters á mánudaginn og það var geeeeðveikt. Geðveikt geðveikt! Ég er enn svo hás að ég kem varla upp orði. Nooo words!

Jæjas.. best að drífa mig í sturtu og spjalla svo aðeins við Císó sem er minn eini félagskapur þessa dagana.

Síðast en ekki síst - afmæliskveðja 3

2006-06-06T20:47:00.000Z

Hann stórvinur okkar Dagur Bjarnason hélt upp á afmælið sitt á dögunum og sást vel á boðsgestum að um gott teiti var að ræða.
Þrátt fyrir að einhverjar hamingjuóskir hafi verið sagðar um helgina vil ég samt nota tækifærið og óska Degi til hamingju með afmælið sitt í gær!

Mynd sem Dagur tók af sjálfum sér.. og sjálfum sér..

TIL HAMINGJU MEÐ AFMÆLIÐ DAGUR OKKAR!
Megir þú eiga ótal fleiri afmælisdaga með dýrindis rauðvíni, steikum og okkur! ;)

((((AFMÆÆÆLISKNÚÚÚS)))))

Update og önnur afmæliskveðja

2006-05-30T13:01:00.000Z

Fyndið hvað netheimar verða fullir af lífi og stuði á prófatíma en svo steinsofnar allt um leið og prófum lýkur. Það er sama sagan hér á þessu blóki.. hef ekki minnsta áhuga á að hanga í tölvunni þessa dagana!

Annars þá er allt gott að frétta af Blásalagenginu. Nýja vinnan mín sem tollvörður er alveg frábær og ég upplifi eitthvað nýtt á hverjum degi og fæ að vesenast um allt, inn í flugvélar, einkaþotur og skip og hitta fullt af spennandi og skemmtilegu fólki (auðvitað líka leiðinlegu en hverjum er ekki sama um svoleiðis). Dagarnir líða eins og ekkert sé! Annað sem er frábært við vinnuna mína er að ég þarf að klæðast einkennisbúningi sem þýðir að ég þarf aldrei að spá í því í hverju ég á að vera á morgnana! Sumum myndi finnast þetta slæmt but I´m loving it! Ég er svona eins og Jóakim Aðalönd með fullan fataskáp af eins fötum. Ójá.

Ég verð nú samt að viðurkenna að þótt nýja vinnan sé mjög skemmtileg þá sakna ég fólksins sem ég hef verið að vinna með síðustu sumur í Landsbankanum. Það var skrýtið að koma ekki til þeirra núna í vor heldur þurfa að fara og kynnast nýju fólki á nýjum stöðum. Þetta gengur samt mjög vel og nýja fólkið (sem eru reyndar bara karlmenn = átakanlega minna slúður og kjaft) er að koma sterkt inn enn sem komið er.

Ég fékk síðan síðustu einkunnina mína í gær og get því formlega staðfest að ég hef lokið 2. ári í lögfræði stóráfallalaust. Ég held samt að þetta hafi verið metár hvað ástundun varðar eða öllu heldur skorti á henni. Þar áttu stóran þátt stúdentakosningar í janúar, Nýja sjálands- ferðalagið mikla, Spánarferð í apríl og almennt kæruleysi. Ég get þó ekki sagt að máltækið "þú uppskerð eins og þú sáir" eigi vel við þar sem mér gekk bara nokkuð vel. Lofa þó bót og betrun að vanda.

Að lokum vil ég svo óska Elínu Lóu S-Ameríkuflakkara til hamingju með afmælið í dag og senda henni stórt knúúúúúús! :)

Jæja.. ætla að drífa mig í sprikl (leikfimi) og svo á eina góða kvöldvakt!

Ding dong dei,
Tollvörðurinn

Afmæliskveðja

2006-05-24T17:16:00.000Z

Þar sem Gunninn er ekki á landinu og ég get ekki hringt í hann þá ætla ég að skella hér inn afmælisknúskveðju!

*KNÚÚÚÚÚSS*

Til hamingju þú þarna í baunalandi :)

Ég elska þig Heineken!

2006-05-10T00:16:00.000Z

Ég er alveg að verða vitlaus. Ekki bara á einhverjum einum hlut heldur nánast öllu.
Í fyrsta lagi er ég komin með myglubletti á viðbjóðslegu lærdómsbuxurnar mínar og með krónískan hausverk vegna stjórnsýsluvandamála (eða ostapoppsofáts). Í öðru lagi er svo stutt í próflok að ég get ekki setið kyrr við námið sem veldur því að ég þarf að sitja lengur við námið að lokum. Á morgun er svo kvöldið fyrir próf sem er ekki í uppáhaldi hjá mér. Það kvöld stunda ég að fletta hratt í gegnum námsefnið í leit að heilögum sannleik og ótrúlegum hugljómunum með hjartað á leið út úr brjóstkassanum. Í þriðja lagi er Jens að kvelja mig með því að fela afmælisgjöfina frá sér til mín efst í fataskápnum og hefur ekki fengist til að gefa neitt upp um hana nema það að hún sé keypt í Ástralíu og hún sé í 10 hlutum. Gjöfin verður afhent á föstudaginn og ég get ekki hætt að hugsa um hana. Æiiii.

Ég mundi allt í einu eftir því að þegar ég var yngri fannst mér Leonardo Dicaprio yndislegasti maður jarðar (fyrir utan prince William auðvitað). Ég býst við að fleiri hafi upplifað sömu tilfinningar í garð þessa núverandi dópfitupoka. Ég hef ekki séð Rómeó og Júlíu síðan ást mín dvínaði. Hún er stórkostleg í minningunni en er sennilega svona rétt bærileg núna.
Það var reyndar ekki mikið að marka karlasmekk minn á yngri árum og til dæmis má nefna að þegar ég var enn minni varð ég ástfangin af fertugum hótelskemmtikrafti á Mallorca sem hét Heinkel en ég hélt að héti Heineken. Ég tók þúsundir mynda af honum og foreldrar mínir höfðu miklar áhyggjur af mér. Sú ást var ekki gagnkvæm sem betur fer fyrir sakleysi mitt og framtíð. Ahhh ljúfar minningar. Allt annað með mig núna sko. Nú vel ég bara virta verkfræðinga og einstaka stjórnmálamenn.. og Jens auðvitað.

Hvað segiði.. síðasta færslan sem fjallar um próf og ostapopp í bili?

Væri ég til í að kúra í þessari hrúgu!

2006-05-08T00:01:00.000Z

Ójá.. svo mjúkt og knúsulegt.

Annars verð ég að kvarta yfir því Elín hvað þú hefur verið löt við það að framleiða kettlinga undanfarið.. gengur víst verr núna þegar þú átt bara tvo högna.
Hún Nóta "ofurkrúttmús, hárbítari og hálfgelgja" Þorbjargardóttir hefur þó bjargað þessu vori fyrir hönd dýra með stuttar snoppur, lítil trýni og stór augu og ég heimta hér með að fá hana lánaða eftir prófin!

So close but yet so far...

2006-05-05T18:04:00.000Z

Eftir viku verð ég að fá mér kokteil og hafa það æðislegt!
Þessi mynd lýsir vel því ástandi sem á mér mun verða:

2006-05-02T19:10:00.000Z

Tíminn er svo skrýtið fyrirbæri..

Mér finnst hann líða alltof hægt og vera eilíflega langt í próflok en á sama tíma finnst mér ég hafa of lítinn tíma til að lesa fyrir prófið.

Ég er óvenjustressuð fyrir þessi próf. Sennilega vegna þess að ég er nánast að frumlesa allt efnið og þetta var meira en ég hélt.. en það hefur nú gerst áður í mínu námi *hóst* og það án þess að stressa frumu.

Hvað er maður samt í alvöru að hafa áhyggjur af prófum. Ég býst við að mikið af ungu fólki um allan heim myndu gjarnan vilja þær áhyggjur. Fá að mennta sig.

Það er hægt að hafa áhyggjur af svo alvarlegum hlutum. Hjón sem ég kannast við sitja í þessum skrifuðu orðum við sjúkrabeð dóttur sinnar sem er með lífshættulegan sjúkdóm. Og ég er með hnút í maganum yfir einhverju prófi. Mér líður kjánalega.

Svona er maður bara. Þó að ég viti að margir í þessum heimi séu að gráta börnin sín, svelta heilu hungri og glíma við aðstæður sem ég get ekki einu sinni ímyndað mér.. þá næ ég samt ekki að gera vandamálið mitt eins lítið og það raunverulega er.
Ekki misskilja mig.. ég veit alveg að það er gott að hafa smá stress í sér fyrir próf en ég er að tala um að mikla fyrir sér hlut sem er ekki vandamál.

Við erum svo lítil..
Litlu vandamálin okkar eru örsmá og merkingarlaus.
Ég vona að einhver skilji um hvað ég er að tala.
Ég held að ég fari bara að fá mér ostapopp og kristal+.

Ljúfa lífið lærdómslífið

2006-05-01T12:55:00.000Z

Ljúf lærdómslaus afmælishelgi að baki með nautalundum, Palin og frábærum gjöfum.
Nú tekur við stjórnsýsluréttur og ugly fruit. Ég elska þann ávöxt! Því ljótari sem þeir eru að utan því sætari og betri eru þeir að innan. Ég valdi einn áðan sem er ógeðsgulur með brúnum blettum og allur krumpaður og mjúkur. Ég á því von á góðu eftir hádegismatinn. Jammí!

Annars þá eru bara 10 dagar í frelsi, regnboga, fiðrildi og hvolpa aka próflok. Það verður yndislegt!

Hilsen!

2006-04-25T16:10:00.000Z

Ég var að borða svo sterkan mat að ég er með svitaperlur á vörinni og suð í eyrum.

Now THAT'S what I´m talking about!

SAVE ME JEBUS

2006-04-19T22:31:00.000Z

Ég er svo ólögleg! Jesús minn hef aldrei lent í öðru eins. Ohhhhhh. En jæja.

Annað í fréttum er:

Ég fékk mér í hádeginu rautt eðalgingsen til að skerpa á einbeitingunni og allt það en þar sem þetta kukl er örvandi hefði ég ekki átt að fá mér nokkra *hóst* kaffibolla sama dag. Afleiðingarnar eru ógnvænlegar svo ekki láta þér bregða þótt ég birtist veinandi og titrandi, böðuð köldum svita fyrir utan gluggann þinn.

Ég er í buxum sem láta mig fá viðbjóðslegan hroll ef þær nuddast utan í stólinn og ef ég klóra í þær.. Þetta gerir setu yfir lærdómi (að viðbættu gingsen-slysinu) töluvert erfiða.

Ég elska gítarsóló.

Það þykir víst ekki sniðugt að taka ferju til Alsír í sumar.

Við Elín lumum á miklu leyndarmáli sem við bæði elskum og skömmumst okkar fyrir í einu.

Takmark mitt í þessari prófatörn er að reyna að borða nógu mikið af gulrótum til að það hafi áhrif á litarhaft mitt.

Það getur verið hættulegt að sofna á strönd.

Jens steig á kló (fyrir innstungu) og hún stakkst upp í löppina á honum og það var blóð um allt.

Hotel California með Eagles er alltaf svo kósý smósý og spænska útgáfan er drepfyndin.

Það er þvílík viðreynsla í gangi á svölum íbúðarinnar við hliðiná.. rauða serían hvað? Ég hef klámkjafta á 12.hæð.

Sumartilfinningin mín er seint á ferð í ár en hún er að koma.. jess!

Fyndasti maður Íslands vinnur á bifvélaverkstæði Toyota og hann lagar bíla sem eru að fara að springa.

Ég fæ bráðlega bjórbumbu. Þökk sé Birni Swift þá drekk ég nú bjór sem vatn og Dagur og Jens eiga heiðurinn af því að ég sé orðinn hveitibjórs-fíkill. Akkúrat öfugt með tequíla.. verð græn af lyktinni.

Ostapopp er æðislegt þótt það lykti eins og sveittir fætur. Með því getur maður svo líka gert kúlur sem fara á kúlurnar ef þið skiljið hvað ég meina.

Ég vaknaði glöð í morgun og hélt ég væri að fara að skoða kettlinga en var svipt því með glæpsamlegum hætti.

Ég er að flagna á löppunum.

Flagna er ógeðslegt orð.

Flagna

Flagn

Draugagangur við Gatwick

2006-04-17T18:49:00.000Z

Mooooning og gleðilega páska!
Við erum komin aftur í kuldann og bækurnar og nú hefst mikið kapphlaup við tímann að ná að lesa allt um úrskurði óbyggðanefndar, þinglýsingar og veðsetningar fyrir próf! Jibbý og húrra!! Þetta er samt skárra en það hljómar... held ég. Ég kemst að því fljótlega.

Það var æææðislegt á Spáni og ég var varla lent þegar útþráin blossaði upp aftur. Ég held ég sé orðin eitthvað lasin.. ferðalasin.. hugsa ekki um neitt annað en ferðalög og skipulagningu mikilla langra ferða um allan hnött. Þeir sem tala við mig fá einmitt að kynnast því að ég hef ekkert að segja nema um vegabréfsáritanir (eins fyndið og það er þá eru Íslendingar, Maldiveseyjaskeggjar og Sambíumenn einu þjóðirnar sem ekki þurfa vegabréfsáritanir til Pakistan), bólusetningar, vatnshreinsitöflur og slíkt. Allir auðþreyttir á þannig tali skulu halda sig úr kallfjarlægð.
Svo horfum við Jens á endalausar heimildamyndir og þætti um ferðir og lönd og erum í þessari viku að klára næstsíðustu ferðaþáttaseríu Michael Palin (sem ég er laumuástfangin af by the way) sem hefur ferðast um allan heim okkur til ánægju og gagns.
Jens kvelst og þjáist af nákvæmlega sömu ferðaþörf svo það stefnir allt í að eitthvað verði gert í málunum.

En aftur að Spáni.. Þetta var rosa notaleg ferð og við slöppuðum bara af í sólinni með vínglas og Andrésblöð (þinglýsingar hvað??), fórum í golf og á veitingastaði. Muy bien eins og þeir segja..
Dagur gerðist svo yndislega frábær að bjóðast til að lána okkur barnið sitt (myndavélina flottu) til að nota í ferðinni og auðvitað tókum við því fagnandi. Ég var þvílíkt að æfa mig að taka myndir og Jensi kenndi mér mikið.. eins og hvernig á að taka myndir mjög hratt og hvernig á að hafa ljósopið opið stutt í einu (til að ná dropum og svona). Nú langar mig geðveikt í svona myndavél en það verður að bíða betri fjárhagstíma. TAKK DAGUR FYRIR LÁNIÐ! :)
Hér má sjá afrakstur æfinga minna:

Brynja á loftinu á leið í ískalda sundlaug

Jens að lenda í sundlauginni

Það er nú ekkert annað flott við þessa mynd nema droparnir.. ég náði þeim loksins eftir að Jens hafði kennt mér að stilla á 6 og svo mátti ekki blikka 22 og svo kom 13.. úff.. ;)

Marta með Prada-sólgleraugun

Speglun í sundlauginni

Brynja

Jens í strandtennis

Á leiðinni heim frá Spánó þurftum við að millilenda á Gatwick og gista eina nótt á 16.aldar sveitarsetri sem búið var að breyta í hótel og var rétt við flugvöllinn..
Mér leið svo undarlega þarna og sagði það við Jens en gat ekki útskýrt hvernig og get ekki enn.. Við fórum og fengum okkur að borða á veitingastaðnum og höfðum það notalegt áður en við þurftum að fara í bælið því flugið okkar var eldsnemma um morguninn.
Ég svaf ekkert.. Mér fannst alltaf eins og einhver væri að draga sængina af mér og hrökk upp! Ég reyndi svo að sofna bara aftur og hlægja að ímyndunarveikinni í mér en ég sver það var eitthvað skrýtið í gangi. Ég vaknaði aftur og aftur við að sængin rann af mér eins og einhver hefði togað í hana og svo þegar ég settist upp í eitt skiptið fannst mér ég sjá eitthvað.. skugga eða eitthvað beint við rúmið (guð hvað maður er bilaður). Ég sagði sjálfri mér að þetta væri bara burðarbitinn eða eitthvað og lagðist aftur en þegar ég settist aftur upp til að sannfæra mig enn frekar var enginn skuggi. Þá fríkaði ég út og vakti Jens sem var frekar skeptískur á þetta. Ég sofnaði aðeins eftir samtal við Jens um hversu heimskulegt þetta væri en vaknaði aftur við undarlegt hljóð sem líktist helst lágu hvæsi. Ég lá svo bara og hlustaði á þetta hljóð og reyndi að greina hvort það væri að segja eitthvað (ég tek fram að ég var mjöööög syfjuð þarna). LOKSINS hringdi vekjaraklukkan kl.4 og við fórum út á völl. Í rútunni á leiðinni út á völl sagði ég Jens frá þessari hræðilegu nótt og frá hljóðinu. Þá kom í ljós að hann hafði heyrt það líka og haldið að það kæmi frá sjónvarpinu. Þetta var samt ótrúlega skerí og sérstaklega (og sennilega vegna þess) þar sem þetta var eldgamalt sveitasetur.

Guð minn hvað þetta varð löng færsla.. svona verður þetta ef maður bloggar ekki nema á nokkra vikna fresti.
Weeeeell.. ætla að klára páskaeggið mitt og lesa um skilgreiningu fasteignar.
Ykkar Erna
Ferða-, Mynda- og Draugamálaráðherra

Hasta luego

2006-04-07T18:27:00.000Z

2006-04-06T12:38:00.000Z

Í gær í Kastljósi eða einhverjum öðrum ofurbroskvöldþætti var farið í heimsókn til manns sem er mikill veiðimaður og farið um allan heim með byssuna sína. Hann hefur svo látið stoppa dýrin upp og opnað safn á heimili sínu sem var einmitt sýnt í þættinum. Í því eru alls konar dýr allt frá litlum öpum og fuglum upp í gíraffa og ísbirni sem stara svörtum gleraugum á stofuhúsgögnin.

Þessi maður virkaði nú á mig sem vænsti kall og hann talaði mikið um það að hann leggði áherslu á mannúðar(dýrúðar?)sjónarmið og mjög sjaldan kæmi fyrir að hann þyrfti að skjóta dýrið tvisvar. Frábært. Af hverju ekki bara sleppa því að skjóta og taka mynd í staðinn. Hann sagði einnig frá því að í sumum tilfellum væri þetta hrein og bein grisjun eins og með gíraffann. Það grey var víst orðið eldgamalt, slapt, aleitt og einmana og í raun greiði gerður með skammbyssuskotinu (já rifflar eru víst á leið út í skotveiðisportinu).

Eftirsókn eftir dýrum á veggi eða í annað getur verið hættuleg. Eftirsókn þýðir peninga og peningar þýða oft óprúttna aðila sem svífast einskis til að eignast þá. Sjá t.d. eins og með fílabein. Ef engin eftirsókn væri eftir því þá væri mun minni misþyrming á fílum þar sem tennurnar eru skornar úr þeim og þeir skildir eftir til að deyja. Það er víst vinsælt núna hjá ríka fólkinu að kaupa uppstoppaða hvítháfa frá S-Afríku sem seldir eru á svörtum markaði fyrir morðfjár en þeir eru í bráðri útrýmingarhættu og hætta er að fjöldi þeirra minnki enn meira ef eftirsókn eftir þeim linnir ekki. Það er margt annað sem maður skilur ekki en snýr einmitt að þessu eins og með það að í sumum asíulöndum þykja apaheilar, étnir beint úr höfuðkúpum lifandi apa, algjört lostæti og gallblöðrur úr björnum eiga einnig að hafa mjög heilsubætandi áhrif og því skornar úr þeim og þeir skildir eftir í sárum. Því eru þessi dýr mjög eftirsóknarverð og stórir smyglhringir sem snúast um að koma vesalings dýrunum hingað og þangað. Eru mörg samtök í því að reyna að koma í veg fyrir þessa og aðra misþyrmingu á öpum og fleiri dýrum starfandi í Asíu. Ég sá einmitt þátt á Animal Planet þar sem fullur gámur af ólöglega innfluttum öpum og björnum var stöðvaður á leið sinni á veitingastað í Víetnam þar sem beið þeirra ekkert gott. Svona er þetta með fleiri dýr en nú er ég komin í önnur mál sem fylla hjarta mitt svo mikilli reiði að ég get ekki hamið mig.

En aftur að veiðimanninum og safninu hans. Ég skil þetta ekki. Að geta þetta í fyrsta lagi. Skotið dýr eins og apa, antilópur eða hvað annað ekki til annars en að láta það hanga á veggjunum heima hjá sér. Fyrsta tilhugsun veiðimanna eins og hans við að sjá fallegt dýr er kannski hversu gaman væri að skjóta það. Nei ég veit það ekki.. þessir veiðimenn bera líklegast flestir mikla virðingu fyrir náttúrunni en ég gæti þetta ekki. Ég fengi samviskubit og sálarkvöl við að drepa dýr og hvað þá að hengja hræið fyrir ofan arininn minn til sýnis.

Ég held að fólk verði að fara að átta sig á því að dýr lifa á þessari jörð eins og við og við eigum þau ekki og höfum ekki rétt til að drepa þau eða fanga í engum tilgangi. Það á ekki að þykja spennandi að hafa þau hangandi dauð upp á vegg. Það á að þykja truflandi og óviðeigandi annars staðar en í náttúrusöfnum. Mér finnst líka illgjarnt að fanga dýr og geyma í búrum í dýragörðum sem ekki hafa svokallaða þjóðgarðastefnu. Fólk á að kynnast dýrum í sínu náttúrulega umhverfi en ekki lokuðum inni á allt of litlu svæði.

Viðhorf fólks og hegðun í garð dýra verður að breytast.

Rafting...

2006-04-01T15:46:00.000Z

.. í sumar?

Mér líst vel á dagsetningarnar 7.-9. eða 14.-16.júlí!

Elín Lóa ævintýrasveppur sendi rauðvínskveðju frá Buenos Aires og í henni óskaði hún eftir því ef mögulegt væri að farið væri í rafting eftir að hún kemur heim í sumar sem verður í lok júní. Elín Helga fer svo til Spánar 24.júlí og kemur aftur 3 vikum seinna og þá er langt liðið á ágúst. Svo er auðvitað spurning með Roskilde-fara.. hvenær komið þið heim aftur og svona. Ég kemst nánast allt sumarið nema nokkrar vinnuhelgar og eftir miðjan ágúst.

Allir að segja hvenær þeir komast og hvenær ekki og við reynum að mixa þetta saman!

Tútílúúú

Jább..

2006-03-30T14:51:00.000Z

Liggur í loftinu..

2006-03-29T11:39:00.000Z

Við Jens erum búin að hafa það alveg agalega rómantískt og menningarlegt síðustu vikur.

Við áttum eins og margir vita "samvistarafmæli" í byrjun mars og fórum af því tilefni út að borða á Kínahúsið við Lækjargötu sem brást ekki frekar en fyrri daginn. Þar plönuðum við margar ferðir, veifuðum fólki út um gluggann og deildum um það hvort mörgæsir hefðu hné og fleira. Kósý kvöld í alla staði sem endaði í miklum hressleika með Degi, Elínu, Mörtu og Steini í karókí á Gauknum.
Við vorum svo það heppin helgina eftir að fá gefins miða frá foreldrum Jensa á lokasýningu á óperunni Öskubusku. Ég hef bara sjaldan skemmt mér jafn vel! Við sátum á fremsta bekk og vorum óspart notuð sem hluti af sýningunni, syngjandi þjónar sópuðu undan löppunum á okkur og mikið söngeinvígi fór fram beint fyrir framan sætin. Ég grét af hlátri allan tímann.
Það kom síðan loksins að því síðasta fimmtudag að við Jens og Dagur skelltum okkur á tónleika hjá Sinfóníunni en ég hafði beðið lengi eftir þessum tónleikum. Við Jens höfðum það að sjálfsögðu agalega kósý og fórum út að borða fyrir tónleikana. Tónleikarnir sjálfir voru frábærir og nutum við þeirra alveg í botn. Sænskur píanóleikari lék einn af uppáhalds píanókonsertunum hans Jensa sem er eftir Sjostakovítsj og stóð hann sig mjög vel þrátt fyrir örlitla ofnotkun á pedölunum að mínu mati. ;) Sinfónían flutti einnig 9. og 10.sinfóníu Sjostakovítsjar og það var svo vel gert hjá þeim að ég var enn með gæsahúð þegar ég fór í bílinn.
Á laugardaginn síðasta var ég á ráðstefnu hjá Stúdentaráði HÍ þegar systir hans Jensa hringir í mig og segist ætla að gefa okkur gjafabréf á Argentínu steikhús sem þurfi að nota kvöldið eftir (sunnudagskvöldið). Nína Þorbjörg litla frænka Jensa er eitthvað erfið og foreldrarnir komast ekki. Við Bens hinsvegar erum alltaf til í rauðvín og nautalundir og eigum engin börn sem valda okkur vandræðum nema þá kannski Císó en við fylltum búrið hans bara af spínati og fórum.

Við Jens með litla vandræða-dýrinu henni Nínu Þorbjörgu.

Gjafabréfið var uppá þriggja rétta máltíð fyrir tvo og titlarnir á réttunum hver öðrum girnilegri, frumlegri og lengri. MMMmmmmmmm
Í Forrétt var Svepparisotto með truflusósu og blönduðum sveppum.. Í aðalrétt var nautalund í púrtvínsgljáa með einhverju dramatísku sem ég man ekki og í desert var yndisleg heit súkkulaði kaka með mjúkum blautum kjarna og ís.
Þessu var svo öllu skolað niður með dýrindis rauðvíni frá Chile.
Þetta er eitthvað sem maður ætti að gera á hverjum sunnudegi.. í alvöru! Breytir algjörlega annars þessum leiðindadegi. Þetta var æðislegt og við þökkum Steinunni og Árna kærlega fyrir okkur! :)

Eins og ég sagði áður þá hafa síðustu vikur verið frábærar og fullar af góðum mat, kokteilum, víni og menningu en nú þarf ég að vera virkilega dugleg í eina og hálfa viku til að koma mér á rétt ról og þá fljúgum við í sólina og hitann..

I loik it

Sumar óskast.. NÚNA!

2006-03-28T14:55:00.000Z

Fyrsta prófið mitt er 28.apríl og það seinasta er 11.maí. Jafnframt eru þetta einu prófin mín en þau eru þó bæði 7 einingar. Ég er geðveikt ánægð með þessa prófatörn af tveimur ástæðum.

1. Ég er búin frekar snemma sem er alltaf gott
2. Ég á afmæli daginn EFTIR fyrra prófið en ekki daginn fyrir eins og undanfarin ár. Það þýðir að ég get haft það frekar kósý en ekki verið titrandi kaffihræ.

Ég hlakka svo til sumarsins að mér er illt í tánum og ég finn lykt af nýslegnu grasi og grillmat en áður en sumarið kemur þarf ég að lesa fullt af bókum sem ég veit ekkert um og ná prófum úr þeim..
Það er því bæði ógnvekjandi og yndislegt að það séu bara 45 dagar þar til ég hleyp út í sumarið.

Jæja.. ég ætla að fara að hjúkra grey Císeró sem var að koma úr tannaðgerð.

Hið daglega líf

2006-03-23T17:09:00.000Z

Mér finnst þessi tími ársins svo erfiður einhvern veginn.. sennilega af því að ég veit að bráðlega þarf ég að fara að borga skuldir mínar við námið og hverfa algjörlega í bækurnar. Páskafríið er þess vegna undarlegt samviskubitstímabil þar sem þú veist að það væri þér best að vera duglegur við bækurnar en aldrei verður neitt almennilegt úr því... ojojoi!
Ég ætla hinsvegar að njóta lífsins samviskubitslaus í sólinni á Spáni í eina viku páskafrísins ásamt Jensa og fjölskyldunni minni.
Á dagskránni er ekkert annað en golf, rauðvín, góður matur og hugsanleg sólböð með uppáhaldsbækurnar mínar, Veðrétt og Þinglýsingar.

Lífið varð við þetta skyndilega mun auðveldara... ójá.

Myndir II

2006-03-14T12:03:00.000Z

Eftir að hafa jafnað okkur á þeim 8 klst. tímamun sem er á Íslandi og Singapore var haldið í næstu höfn sem er hvorki meira né minna en 13 klst. á undan Íslandi, Nýja Sjáland. Í Wellington NZ býr Hörður bróðir hans Jens og voru miklir fagnaðarfundir á flugvellinum þar sem þeir bræður hafa ekki hist í 4 ár. Hörður er giftur japanskri konu sem heitir Tomoko og er alveg frábær en ég hafði aldrei hitt á þessum tímapunkti.. Ég hafði bara einu sinni hitt Hörð og það var daginn eftir að við Jens byrjuðum saman og einmitt þann dag var Hörður að flytja hinum megin á hnöttinn.
Ég var því frekar feimin fyrst en það var fljótt að hverfa þegar ég var tekin og knúsuð og heilsað eins og þau í Jensa fjölskyldu eru fræg fyrir.
Það var ein önnur manneskja sem hvorki Jens né ég höfðum hitt áður og það var hún Sólrún Maya, litla frænka hans Jensa.

Hún er tveggja ára og alveg ótrúleg. Hún talar bæði japönsku og íslensku og örlítið í ensku og það var svo gaman að kenna henni eitthvað því það bara límdist við hana. Ef ég sagði bátur og benti á bát þá var mér bent á hvern einasta skip/bát næstu vikuna og fékk að heyra að þetta bæri sko "báddu". Svo strauk hún manni og kjassaði og var á allan máta yndislegt barn.. ekki góð "getnaðarvörn" ;)

Jens var alveg heillaður af þessari litlu frænku sinni og hún af honum.

Bræðurnir Hörður og Jens á útsýnisstað yfir Wellington. (Báðir með hatta úr kengúruskinni sem við kvensur þeirra hlógum mikið yfir)

Tomoko og Sólrún Maya á ströndinni í Wellington.

Hörður og Sólrún Maya á ströndinni.

Útsýnið úr húsinu þeirra Harðar og Tomoko er æðislegt. Reyndar er Wellington frábær borg full af gróðri og brekkum. Bröttum brekkum.. Margir þurfa að leggja bílunum sínum eins nálægt húsunum sínum og þeir geta og taka síðan lyftu restina af leiðinni. Húsið þeirra er mjög ofarlega en við gátum samt keyrt alla leið.

Hinum megin við húsið er burknafrumskógur og úr honum komu margvísleg torkennileg hljóð. Þvílík staðsetning fyrir hús! Við fengum æðislegt veður þessa daga enda hásumar á suðurhvelinu (hávetur á Íslandi). Ég brann m.a.s. á öxlunum því ég gætti mín ekki. Sólin í Nýja Sjálandi er sterkari en á Spáni en það sem blekkir mann er að hitinn verður ekki eins mikill út af sterkum hafvindum.

Wellington. Við urðum mjög hrifin af þessari borg og skiljum alveg hvað starfsfólkið í Lord of the Rings var að tala um núna. ;)

Það eru enn fullt af myndum eftir en það er svo brjálað að gera að ég kem ekki meiru inn núna.. við sjáum til hvernig þetta fer! :)

Myndir!

2006-03-07T16:32:00.000Z

Ég ætla að skella inn myndum úr fyrsta hluta þess sem kallað er myndaflóð aldarinnar! :)

Við stoppuðum í Singapore á leið okkar til Nýja Sjálands og líkaði vel! Við höfðum heyrt mikið um að þessi borg væri alveg steríl en okkur fannst hún bara mjög skemmtileg og fyrst og fremst standa veeeel undir nafni sem matarhöfuðborg heimsins. Ójá.. ég fæ alveg vatn í munninn við að hugsa um chilikrabbana og sataykjúklinginn og allt hitt sem við lögðum okkur til munns þarna!

Tekið af skjánum mínum í flugvélinni.. þarna er eins og sést töluvert eftir til Singapore eða svona 11 klst. Þetta var samt alls ekkert leiðinlegt! Allir í flugvélinni höfðu sinn eigin skjá svona eins og þennan, og fjarstýringu með sem þeir notuðu í að velja eitthvað af tugum grínþátta (family guy, simpson, fraisier, friends) og hátt í hundrað bíómynda sem voru frá nýjustu vestrænu hitturunum til Lawrence of arabia og litskrúðugra Bollýwoodmynda. Ég horfði á svona 12 grínþætti, nokkrar bíómyndir og borðaði virkilega góðan flugvélamat.. Bara eins og frekar langt kósýkvöld heima.

Komin til Singapore!

Gamli tíminn og sá nýi mætast í Singapore. Litlu húsin við ána eru allt veitingastaðir af öllum þjóðernum og tegundum. Við Jens tókum heilan dag í það að labba á milli og smakka bara pínulítið af hverju og höfum nú eignast ýmsan nýjan uppáhaldsmat og komist að því að það sem telst sterkt á íslandi er eins og jógúrtssósa þarna. Það kom eldur út um nefið á mér á tælenskum veitingastað þetta kvöld eftir fyrsta bita af kjúklingi í rauðu karrýi.. Mmmmmmmm!

Við fengum okkur Singapore Sling á Raffles-hótelinu þar sem hann var blandaður fyrst um 1920.

Í Singapore rekast á margir menningarheimar og við heimsóttum bæði Chinatown og little India.

Mjög heitt, rakt og mollulegt er í þessari borg og allir með loftkælingar. Þessi bakgata sýndi það vel.

Þessir bátar kallast bumboats hafa verið til á þessu svæði mjög lengi og sigla mikið upp og niður á sem rennur gegnum Singapore.

Við fórum einmitt í einn og það var mjög gaman og gaf okkur aðra sýn á borgina (auk þess sem blærinn var vel þeginn).

Krabbi í chilisósu sem er einmitt núna draumamaturinn okkar... úff hvað það er gott!

Jens hetja með óargadýr á öxlunum! Eins og fólk sér þá stóð honum heldur ekki á sama! ;)

Smá sólbaðspása á paradísarströnd rétt við Singapore.

Fyndið samt að sjá öll risaskipin úti fyrir ströndinni..passar ekki alveg inn í paradísarímyndina! Höfnin í Singapore er ein af stærstu iðnaðarhöfnum í heimi.

Fórum á geðveikt sædýrasafn þar sem maður fór á færibandi undir svona risafiskabúr og hákarlar, sækýr og fleira svamlaði rétt fyrir ofan mann. Very nice!

Ég var mjög ánægð með að hitta Nemo og Dori!
Meiri myndir fljótlega.. ég ætla að fara að fá mér góðan mat! :)

Vó... jarðskjálfti!

2006-03-06T14:45:00.000Z

Og ég er ekki með neinn hausverk! (Ef einhver skilur þetta þá fær hann kex og kókómjólk)
Jarðskjálftar eru spennandi á meðan þeir skaða engann.. þá verða þeir ógnvænlegir. Ég vona að það komi annar!

Dog sick I tell you!

2006-03-01T15:31:00.000Z

Þegar ég fór að sofa í morgun um kl.6 var ég ótrúlega hress eftir næturvörutalningu með gelgjum í náttfötum en þegar ég vaknaði þremur tímum seinna við eitthvað sem ég hélt að hlytu að vera rakvélablöð í hálsinum á mér, var ég ekki svo hress. Nú er ég bara sisona komin með hálsbólgu, hita og bölvaðan hausverk sem mælist á jarðskjálftamælum veðurstofunnar. Ég vona að ég sé ekki komin með flensu! Inflúensu jafnvel!! *ógnvænlegt hljóð og andköf*

Einmitt það sem mig vantar.. frekari ástæður og afsakanir til að taka mér frí frá lærdómnum.

Ég neyddist til að skríða fram úr rúminu núna rétt áðan, aðframkomin af hungri og þorsta, og fór fram í eldhús þar sem allt var í rusli og ekki ein einasta skál hrein fyrir núðlurnar mínar... ég var í alvöru næstum því farin fram af svölunum í geðshræringu minni. Mér leið eins og marglyttu á landi.
Þetta bjargaðist sem betur fer og mér tókst að þvo skál af miklum hetjuskap. Guði sé lof. Ég marglyttaðist svo stynjandi aftur inn í rúm með núðlurnar mínar og horfði á einn Simpson´s þátt undir sæng.. Það var nánast allur tíminn sem ég hafði til að vera slöpp í bili því núna eftir hálftíma á ég að vera mætt á fund og svo annan á eftir honum og þá þann þriðja. ÞÁ ætla ég að fara heim og vera aftur veik ef líkami minn verður enn á þeim nótunum auk þess sem ég hef planlagt að hella mér yfir Jens fyrir að hafa verið að hangsa í skólanum þegar hann hefði átt að vera heima að þjóna og vorkenna mér, fárveikri konunni!
Æ mér sýnist ég nú geta séð um vorkunnardeildina sjálf ;)

Guð hvað þetta er skemmtilegt blogg!

** uppfært kl.21:00 sama dag **
Mér leið mun betur eftir fundina þótt undarlegt sé og ætlaði ekkert að kvarta meira yfir slappleika en þegar ég kom heim hafði Jens greinilega vorkennt mér því hann var búinn að elda þriggja rétta máltíð fyrir okkur, þrífa allt og fylla íbúðina af kertum og kósýheitum..! Hann er svo mikið yndi! :)
Nú ætla ég að vera pínu lasin aaaaaðeins lengur og láta knúsa mig.. ;)

Það sem ykkur hefur alltaf langað til að segja um mig..

2006-02-27T15:14:00.000Z

Nohari

Johari

2006-02-23T14:28:00.000Z

Ég ætla að gera svona eins og allir hinir því þið vitið hvað ég er mikil kind í mér.

Fernt sem að ég hef unnið við:
- Á kassa í Nettó
- Starfsmaður í eldhúsi á elliheimili/hjúkrunarheimili
- Þjónustustúlka á VOX
- Gjaldkeri í banka.

Fjórar bíómyndir sem að ég gæti horft á aftur og aftur:
- LOTR að eilífu
- Bridget Jones´s diary
- Monty Python myndirnar
- Don Juan de Marco.. bara svo góður söguþráður sko!

Fjórir sjónvarpsþættir sem mér finnast skemmtilegir:
- Family guy
- Friends
- Sex and the city
- Allt með David Attenborough stórvini mínum ójá.

Fjórir staðir sem ég hef búið á:
- Löngumýri 20
- Ásbúð 87 (við hliðiná þarna djöfuls dansstelpunni)
- Rjúpnahæð 3
- Blásölum 22

Fjórir staðir sem ég hef heimsótt í fríum:
- Spánn/Flórída/Krít = afslöppunarfrí í sól og vínlegi.
- Nýja Sjáland.. mikið ferðalag og góður hasar.
- Egyptaland.. aðeins meiri hasar
- Íran.. mun meiri hasar

Fjórar síður sem ég fer daglega inn á:
- mbl.is
- ugla.hi.is
- wulffmorgenthaler.com
- Blogg smogg..

Fernt matarkynst sem ég held upp á:
- Piparsteik a la pabbi.
- Djúsí súkkulaðiköku a la mamma sem úr lekur súkkulaðigums þegar maður setur skeið í hana.. æ þið skiljið. Svo bara allt með súkkulaði.
- Sushi a la Jens. Helst með laxi eða túnfiski.
- Kjúklingabringur a la moi í bbq-sykurlegi og sesamfræum með fetaostasalati og kartöflurétti. (samt mömmuuppskrift en hey)

Fjórir staðir sem ég vildi heldur vera á núna:
- Að kafa við strandir paradísareyju einhverrar með ekkert framundan í nokkra daga nema afslöppun.
- Á leið í road trip um Ástralíu með góðu fólki.
- Í vínsmökkun í Toscanahéraði á Ítalíu.
- Að borða satay-svínakjöt... í Malasíu.
og fleira og fleira og meira ...

Þetta er skrifað í 35.000 feta hæð yfir Svartahafi um borð Boeing747 flugvél Singapore Airlines

2006-02-03T22:00:00.000Z

Read it and weep! ;)

2006-01-31T15:16:00.000Z

Úff hvað er mikið að gera hjá manni þessa dagana! Er að skemmta mér konunglega alla daga í stofukynningu upp í Háskóla fram að kaffi og þá taka við fundir, vesen og tilheyrandi langt fram á kvöld en svoooo...eldsnemma á föstudagsmorgun hefjum við Jensi ferð okkar hinum megin á hnöttinn. Einhvern tíma áður en sú stund rennur upp þarf ég líka að gera huggulegt í Blásvítunni, þrífa Císó og flytja hann og hafurtask til Guðföðursins, pakka og kveðja fjölskyldu og vini + það að vera æðisleg í kosningabaráttunni. *thumbs up*
Þrátt fyrir alla þessa hamingju er þó tvennt sem er að pirra mig þessa dagana.. tvær bólur á hökunni á mér!!! Nú fæ ég blessunarlega ekki oft bólur ( 7 9 13 ) og af hverju í veröldinni þurftu þessar tvær stóru, fallegu, glansandi rauðu bólur að koma þegar ég er í eilífum myndatökum og að kynna mig í öllum kúrsum í háskólanum?? Þetta er sko ekki sanngjarnt. Ég hef verið að reyna að fela þær með ýmsum ráðum en þær eru lúmskar og brjótast í gegnum hvaða meik og krem sem er og verða svo í hefniskyni fyrir tilraunina allar þurrar í kringum "aðalbólusvæðið" þannig að ég verð eins og holdsveikisjúklingur í framan. Ekki það að ég hafi eitthvað á móti holdsveikisjúklingum... Ég ætla ekki að tala meira um bólur né holdsveika svo þið getið haldið áfram að lesa.

Ég kvaddi Elínu Lóu og Snabba á laugardaginn en þau leggja einmitt upp í ferð sína um S-Ameríku í dag og ég óska þeim enn og aftur góðrar ferðar og skemmtunar og benda þeim á að gera aldrei neitt sem Gunnar Eyþórsson myndi gera!

Mig langar að senda samúðarkveðjur til Þorbjargar og fjölskyldu en Matti, hundurinn hennar, dó í fyrradag eftir að hafa verið mikið veikur. Hann var ótrúlegur og einn af gáfuðustu hundum sem ég veit um. Hann skildi alltaf hvað maður var að tala um (mat, göngutúr, hann sjálfan), rosalegur smalahundur sem gat smalað saman hverju sem er og ég sver að hann talaði mannamál stundum þegar hann vældi. Ég mun aldrei gleyma því þegar ég og Þorbjörg vorum að borða köku við eldhúsborðið og hann mátti ekki koma og átti að vera í þvottahúsinu en hann skreið á maganum til okkar yfir stofuna og þröskulda (ótrúlega lúmskur) og ætlaði sér að fá köku.. sem hann fékk auðvitað að lokum. Það verður mjög skrýtið að fara heim til Þorbjargar núna og hafa engan Matta á svæðinu til að knúsa. :(

Þetta endaði með því að verða stór og mikil færsla full af mismunandi efni sem er kannski viðeigandi því ég mun líklegast ekki skrifa hér aftur fyrr en í lok febrúar eða byrjun mars.
Knús til ykkar allra og svo líka innilegar illfygliskveðjur til Dossu sem mun að líkindum eignast litla stúlku á næstu dögum eða á meðan við verðum í Singapore eða Ástralíu. :)

X - A og önnur mál!

2006-01-23T00:09:00.000Z

Jæja eftir 2 vikur verð ég rétt ólent í Sydney en það er margt sem þarf að gerast áður en ég yfirgef klakann. Kosningar til stúdenta- og háskólaráðs verða haldnar 8.-9.febrúar og er ég þar í fyrsta sæti á lista Vöku til Háskólaráðs. Ég ætlast að sjálfssögðu til þess að þið vinir mínir styðjið mig og félaga mína til sigurs og hvetjið alla til að velja rétt! :)
Hér má skoða betur frambjóðendur Vöku 2006

Áfram Vaka!

Við fórum svo í frambjóðendaferðina í gær og það var alveg frábært í alla staði. Óhugnalega mikið áfengi var drukkið bæði í leikjum, keppnum og almennu stuði, fjöldamet var slegið í pottinum og bjór-gufunni, sungið og spilað á gítar til morguns, sumir kysstust og aðrir sofnuðu undir blautu handklæði eftir misheppnað sængurrán. Ég vaknaði blessunarlega laus við þynnku um 12 leytið með hárið í allar áttir og óupplýst handmeiðsl. Hægri olnboginn er stokkbólginn, blár og marinn og ég get ekki beygt hendina svo fullnægjandi þyki og ég hef í raun ekki hugmynd um hvernig þetta gerðist. Líklegast þykir mér þó að þetta hafi gerst þegar ég stökk með tilþrifum ofan í heita pottinn með skemmtilegum afleiðingum.

Næst á dagskrá er svo póker á miðvikudagskvöld, Rokk-Vaka á fimmtudagskvöld og tryllt partý á föstudagskvöldið.

Áfram áfram..

2006-01-11T16:57:00.000Z

Tíminn flýgur. Nú er komið ár síðan við Jens hættum við allar áætlanir um að flytja í miðbæinn þegar við duttum niður á Blásvítuna og vildum ekkert annað! Við keyptum hana svo daginn eftir og höfum búið hér nú í tæpt ár. Sambúðin gengur framar öllum vonum og engin tannkremstúpu- eða klósettsetuvandamál hafa komið upp enn! Okkur finnst mjög notalegt að eiga lítið hreiður við tvö ein og ekki sakar að þetta hreiður er úr fínustu greinum og með útsýni sem enn gefur manni gæsahúð niður bakið. Endalaus rómantík!

Stuttu eftir að við fluttum inn í febrúar 2005 fengum við okkur ofurlítinn naggrísaunga þar sem ég gat ekki ímyndað mér að hafa engann til að hugsa um (fyrir utan Jens auðvitað). Grísinn þann nefndum við Cíceró því hann tuðaði stanslaust allan daginn í búrinu sínu. Nú í dag er Císó orðinn 1 árs og alls ekki lítill lengur heldur feitur og frekur og á stærð við lítinn kött. Við erum búin að kenna honum ýmis trikk eins og að betla mat á afturfótunum, öskra þegar hann vill e-ð og ekki pissa þegar það er kúrutími. Í tilefni afmælis hans ætla ég að birta nokkrar myndir af Císónum sjálfum.

Búinn að koma sér vel fyrir með allt til sýnis..! ;)

Gleðileg jól og nýtt ár!

2006-01-04T23:29:00.001Z

Jólin eru besti tími ársins án efa. Ég er búin að hafa það svo agalega gott þessi jól að það verður mikið áfall að detta aftur inn í hversdagsleikann. Ég hef sofið mikið og kúrt, lesið, borðað góðan mat, konfekt og drukkið heitt súkkulaði í lítravís, horft á jólamyndir og aðrar myndir, spilað heilu næturnar og fengið mér svo nokkrum sinnum í aðra tá með góðu fólki og fjölskyldu. Ég er mjög fegin þeirri ákvörðun minni að vinna ekki um jólin og mín ofhlöðnu batterí eiga eftir að nýtast vel þetta vorið.

Jólalegt í Blásölunum.

Það er svo ekki hægt að segja að hversdagsleikinn sem nú tekur við sé grámyglulegur eða leiðinlegur. Fyrst á dagskrá eru kosningar til stúdentaráðs Háskóla Íslands þar sem ég mun styðja Vöku af mikilli hörku og svo 3.febrúar nk. tekur við ævintýraferð yfir hnöttinn til Nýja Sjálands. Ég er ekki að kvarta og lífið er stórkostlegt! :)

.. bara tveir dagar eftir af prófum!

2005-12-19T12:14:00.000Z

Ég var að taka saman myndirnar frá Íran og ætlaði að setja þær á netið með einhverju sniðugu forriti en þar sem ég er tölvufötluð þá kann ég ekki að setja inn nema eina mynd í einu og það tekur samt korter! Ein mynd.. korter... Mér endist ekki ævin í þetta verk! Ég verð víst að bíða þar til Jens kemur heim. Eftir að hafa verið að grúska í þessum myndum langar mig svo að deila þeim með ykkur því eins og þið flest vitið þá urðum við Jensi ástfangin af þessu landi, fegurð þess og yndislega fólkinu sem býr þar. Því ætla ég að setja nokkrar myndir inn ykkur til yndisauka sem eruð enn í prófarugli eins og ég. Hinir geta átt sig og sitt útsofelsi.

Útsýnið af svölunum okkar á hótelinu í Bandar-e-Bushehr sem er lítill bær við Persaflóann. Þennan dag var 43gráðu hiti og 100%raki og við hlupum á milli loftkælinga(ég í kuflinum að sjálfssögðu).

Allt sem þið hafið heyrt um sólsetur við Persaflóann er satt. Þetta var ótrúlegt.

Eyðimerkurborgin Yazd. Sú mest töfrandi borg sem ég get ímyndað mér. Gamli hluti borgarinnar er byggður úr leir og þröngar göturnar, sandurinn, markaðarnir, vindturnarnir og stemmningin er eins og að detta inn í Þúsund og eina nótt. Hótelið okkar var í miðjum ranghölunum og hét Silk road hotel en það hefur einmitt eins og nafnið bendir til verið notað af silkileiðarförum í mörg hundruð ár og ævintýralegt eftir því. Ætlum einhvern tíma að fara aftur og vera þar í margar vikur. Ólýsanlegt.

Sólsetur í Yazd. Tekið ofan á þaki heimilis manns sem við kynntumst þarna og var teppasali. Hægt var að stökkva á milli þaka eins og ekkert væri og var það töluvert fljótlegra og mikið notað af krökkum og köttum.

Basarinn í Shiraz. Brjálað að gera og fólk kaupir inn þarna bara eins og við gerum í Hagkaup. Önnur hver búð selur persnesk teppi á verði sem Íslendingar missa andlitið yfir.

Grafhýsi stofnanda og konunga Persíu. Að vera þarna aleinn í þögninni (ég er þarna í kuflinum neðst á myndinni í miðjunni) lét manni líða eins og hluta af einhverju sem ekki er svo auðvelt að skilja.

Við röltum ein um einar merkustu fornminjar heimsins, Persepolis.

Útsýni yfir Esfahan og mosku þar sem á að vera ein fallegasta moska í heimi.

Brúin í Esfahan. Ótrúlega falleg. Ef þið lítið undir brúna þá er á stólpunum lítið kaffihús þar sem hægt var að fá sér kaffi og kökur í kílóavís og svo auðvitað vatnspípur. Þarna var alltaf mikið um að vera, fjölskyldur á röltinu með börnin sín, fólk á stefnumótum og gamlir menn að rífast. Við vorum einu túristarnir þarna eins og hvar sem við komum en fólk var vægast sagt vingjarnlegt og gerðu allt sem þau gátu fyrir okkur og fannst við agalega spennandi.

Moska í Esfahan á öðru stærsta torgi í heimi sem notað var eitt sinn fyrir pólóleik en það fundu Íranar upp. Torgið og moskan er eins og annað fallega upplýst á kvöldin.

Flestar moskurnar nema þær sem keisarinn vildi láta flýta, eru handútskornar og þessu munstri púslað saman. Það er svo yfirþyrmandi að skoða þessa fegurð að maður verður eiginlega að hugsa um alla vinnuna sem hefur farið í þetta.

Bandaríska sendiráðið í Tehran þar sem gíslatakan fór fram. Á því eru ýmsar myndir svipaðar þessari (frelsisstyttan með hauskúpu í stað höfuðs og andlits) og annað sem erfitt er að ná myndum af því það eru mannaðir varðturnar í garðinum og þeim líkar víst illa þegar túristar taka myndir og regla númer eitt er að gera aldrei neitt sem mönnum vopnuðum hríðskotabyssum líkar illa. Við náðum þessari mynd á meðan varðmaðurinn leit fyrir hornið en eins og sést var þetta frekar stressandi.

Mashuleh.. lítið þorp í fjöllunum við Kaspíahafið. Það liggur svo bratt í fjallinu að göturnar þurfa að vera ofan á húsunum fyrir neðan eins og sést á neðstu myndinni. Þarna keyptum við nammið sem þið fenguð mörg að smakka.

Þessi gamla kona skildi ekkert í okkur en seldi okkur sokka sem hún prjónaði.

Við sigldum á hraðbát um Kaspíahafið (ekki allt þó) og skemmtum okkur vel eins og sést. Þarna var ég með risavatnalilju á höfðinu og hún var næstum því búin að láta mig takast á loft. Það var gaman. Svo keyptum við styrjuhrogn.

Fólkið í Íran er yndislegt og í þessari ferð eignuðumst við marga vini sem við skrifumst á við í hressilegum tölvupóstum.

Þetta er orðin alveg hrikaleg færsla og mál til komið að bækurnar fái athygli aftur en eins og þið kannski finnið þá mælum við Jens eindregið með ferðalögum um Íran og blásum á raddir fordóma. Það gilda bara sömu reglur um ferðalög þangað og til annarra framandi landa, að fara varlega og virða siði landsins. Það er að vissu leyti erfiðara í Íran vegna laga um klæðnað kvenna en ekkert til að draga kjark úr kvenferðalöngum.. Kaupið bara nógu léttan kufl og gerið gott úr þessu. :)

Svo er það bara stóra reisan eftir einn og hálfan mánuð haaaaa??

Aðeins 8 dagar í ..

2005-12-13T21:13:00.001Z

og

En þangað til.. samninga- og stjórnsýsluréttur!
*yfirlið*

Það les greinilega enginn það sem ég skrifa!

2005-12-11T20:45:00.000Z

Þið verðið að lesa textann krakkar! Fólk er allt í einu farið að falla fyrir þessu prófi sem ég gerði hér fyrir neðan og síðasta klukkutímann hef ég fengið yfir 30 pósta frá öllum mögulegum aðilum og í heild eru svörin hátt í 100!
Elsku fólk.. Þetta er einhver hrekkur sem gengur um internetið og ég féll fyrir og fannst sniðugur en ég ætlaði í alvörunni ekki að láta þetta heppnast svona vel og hélt að það nægði að skrifa undir linknum að þetta væri gabb en svo var víst ekki! Ég bið alla afsökunar á þeim sálarlegu vandræðum sem þetta hefur kostað þá svona í prófatörninni.
Þeir sem sendu mér póst eftir klukkan 3 í dag þurfa samt ekkert að óttast uppljóstranir eða annað því ég eyddi þessu prófi og upplýsingunum sem því fylgdi án þess svo mikið að opna skrár forvitnislegustu einstaklinganna. Enginn, og þá ekki einu sinni ég, mun því vita um ástkonur/menn yðar. Jens var mjög ósamvinnuþýtt vitni að þessari eyðingu (hann vildi skoða allt og hefja mútustarfsemi) og getur fúllyndislega staðfest það að ekkert komst út.
Ástæðan fyrir þessari miklu eyðingu er að ég veit alveg hversu óþægilegt svona getur verið og ég nenni ekki að missa svefn yfir þessu með samviskubiti yfir líklegri angist mennta- og háskólanema. Ég er svo meyr krakkar.. þið vitið það!

Við skulum bara segja að sé fegin að hafa ekki sett inn prófið sem MannvonskuJensi stakk uppá.. þá væru lögfræðingar sennilega komnir á dyrnar hjá mér!

Kveðja, Erna platari og illmenni

Ég hlakka svo til jólanna!

2005-12-11T12:16:00.000Z

Það er aldeilis farið að styttast í þetta jólastúss mér til mikillar gleði. Hinsvegar á ég enn eftir 2 próf sem ég á erfitt með að læra fyrir.. Einbeitingin kláraðist alveg yfir þessu skaðabótaréttarprófi.
Eeeeen verð að rífa mig upp á rassinum og lesa um ógildingarástæður svo ég verði með góða samvisku um jólin.
Ég og Jens mældumst 98% líkleg til að "hook up" en hins vegar mældumst við Þorbjörg ekki nema 12%.. Því miður Þorbjörg en þú getur prófað að setja Ragga inn í staðinn ;)
jæja.. back to the books..

*uppfært síðar sama dag*
Jæja.. það féll enginn fyrir þessu prófi mínu nema Elín og ég veit hvort eð er allt um hana. Þið eruð bara leiðinleg og hafiði það! ;)
Má maður ekkert skemmta sér í prófum.. *dæs*

Grimmd

2005-12-05T15:42:00.000Z

Hugsið ykkur. Hjón í göngutúr fundu fyrir tilviljun nokkra agnarsmáa hvolpa við Hvaleyrarvatn, nær dauða en lífi af hungri og kulda. Einhver hefur ekki nennt að reyna að koma þeim út eða svæfa þá hjá dýralækni og valdi frekar þessa leið. Maður verður svo reiður þegar maður heyrir svona að mig langar helst að hella mér í CSI-störf og finna þessa aumingja og gefa þeim það sem þeir eiga skilið.
Í sumar fundust líka í flæðarmáli þessa sama vatns hvolpar í poka sem hafði verið hent í vatnið til að drukkna. Hvernig tekur fólk þessa ákvörðun? Hvernig fólk tekur yfirhöfuð þessar ákvarðanir? Hver er svo kaldur að hann hendir 5 hvolpum í poka, leiðir hjá sér allt væl og vinahót litlu greyjanna sem ekki vita hvað bíður, sleppir pokanum í vatnið og fer síðan heim að horfa á fréttirnar? Hvað hugsar slík manneskja á leiðinni heim?

Það undarlegasta og versta við þetta allt saman er að þetta er algengt. Svo algengt að ég skil það ekki. Einu sinni fann bróðir mömmu kettlinga í poka í ruslatunnu á Akureyri. Þeir voru allir dánir nema einn og amma tók hann að sér mér til mikillar gleði! Svo mun ég aldrei gleyma schefferhundinum sem fannst í Reykjavíkurhöfn með stein bundinn um hálsinn. :(

Mér finnst vera ástæða að tilkynna það hér að ef einhver hefur í huga að yfirgefa/drekkja nokkrum hvolpum/hundum/kettlingum/naggrísum/músum eða hverju sem er einhvern tíma í framtíðinni af því hann nennir ekki að reyna að gefa þá eða svæfa, þá bendi ég þeim hinum sama á að skilja þá frekar eftir fyrir framan íbúð 1203, Blásölum 22 Kópavogi og ég skal taka við þeim no questions asked.

Helvítis aumingjar.

Föstudagur maður!

2005-12-02T21:45:00.000Z

Það er svo stórkostlega skrýtið að þó ég sé að læra á fullu núna alla daga og þeir renni saman í eina langa lærdómstörn með stöku simpsons- og svefnhléi, þá finnst mér samt alltaf notalegt að vera til á föstudögum... Þrátt fyrir að hann sé nákvæmlega eins og allir aðrir dagar og þar með taldir sunnudagar sem fara ósegjanlega í taugarnar á mér, þá líður mér föstudagslega.

Frank Sinatra mætti syngja mig í svefn anytime. Og þá meina ég syngja, ildýrin ykkar!

Varúð.. tilfinningaflóð!

2005-11-29T14:13:00.000Z

Ef mér fyndist kjöt ekki svona óþægilega gott þá myndi ég samstundis gerast grænmetisæta. Kannski ég verði það einhvern tíma í framtíðinni.

Framtíðin. Þegar ég hugsa um þá framtíð sem mig dreymir um þá sé ég sjálfa mig ekki í einhverri ákveðinni stöðu, með fullar hendur fjár, umkringd börnum eða nokkuð annað heldur fæ ég ákveðna tilfinningu. Ég hef alltaf fundið fyrir þessari sömu tilfinningu þegar ég hef látið mig dreyma um framtíðina og ég vona að ég eigi einhvern tíma eftir að komast að því fyrir hvað hún stendur. Veit einhver um hvað ég er að tala? Það er mjög erfitt að útskýra þetta en þessi tilfinning er mjög sterk og mig langar svo heitt að upplifa hana en ekki bara dreyma um að finna hana. Nei.. ég get ekki útskýrt þetta. Þetta er tilfinningin sem ég vil fá úr lífinu. Ákveðin lífsfullnæging.
Ég hef fundið fyrir öðrum svipuðum tilfinningum eins og þegar ég var lítil og dreymdi um að ferðast um allan heim þá fékk ég spenning í magann og hlakkaði til að upplifa þessa tilfinningu sem ég gerði svo síðar og þá tilfinningu fæ ég svo í hvert skipti sem ég stíg upp í flugvél á vit ævintýranna.
Ég fékk einnig merkilega tilfinningu uppfyllta þegar ég kynntist Jens. Tilfinninguna sem ég fékk þegar ég lét mig dreyma um ótrúlegan mann sem ég gæti lifað skemmtilegu ævintýra- og ástríku lífi með..
Ég get því ekki annað en beðið og vonað að þessi tilfinning mín um framtíðina rætist eins og hinar hafi gert.

Ég man líka vel eftir tilfinningunni (svo við höldum áfram á þeirri braut) sem sló mig í andlitið þegar ég kynntist Elínu, leiðinlegu dans-stelpunni í næsta húsi.

Ég var alveg forviða á því að hún hefði leynst í Garðabænum allt mitt líf án þess að ég hefði áttað mig á því. Ég gleymi aldrei okkar fyrsta samtali sem snérist um nýfundnar dularfullar eyjur í Kyrrahafinu og ættbálka þeirra.. You got me on hello... ;)
Ég er svo afskaplega þakklát fyrir allt sem ég á.. frá bestu fjölskyldu og vinum sem hægt er að eiga til sætasta naggríss í heimi!

Þessari tilfinningaríkustu færslu áratugarins er nú lokið..

Cíceró hefur fyrirgefið móður sinni að lokum!

2005-11-18T14:06:00.000Z

Sjáiði bara hvað hann er lítill og sætur.. soldið líkur pabba sínum held ég!

Enn eitt próf..

2005-11-17T17:59:00.000Z

Your Career Type: Enterprising

You are engertic, ambitious, and sociable.
Your talents lie in politics, leading people, and selling things or ideas.

You would make an excellent:

Auctioneer - Bank President - Camp Director
City Manager - Judge - Lawyer
Recreation Leader - Real Estate Agent - Sales Person
School Principal - Travel Agent - TV Newscaster

The worst career options for your are investigative careers, like mathematician or architect.

What's Your Ideal Career?

Jæja.. ég virðist vera á réttri leið! Sátt með stærðfræðiathugasemdina þarna í lokin ;)

Brrrrrr...

2005-11-15T10:57:00.000Z

Eins kósý og rómantískur veturinn getur verið þá er fátt erfiðara en að skríða undan hlýrri sænginni, klæða sig í larfana og hlaupa út í frostið. Enn verra er ef þarf að skafa af bílnum og snjórinn bítur mig í puttana og fer inn í ermarnar. Í dag þurfti ég að skafa af bílnum að utan sem innan. Hvað er málið með það?
Svo er bíllinn ískaldur og puttarnir frjósa fastir við stýrið. Glæsilegt.

Hvaða tröll ert þú..?

2005-11-13T14:34:00.000Z

Tók enn eitt prófið á netinu og í þetta skipti hvaða tröll ég væri. Djísus hversu langt maður gengur til að sleppa við lærdóm..
Þetta kom semsagt út úr prófinu hjá mér:

Partítröll

Þú ert nýjungagjörn, tilfinningarík félagsvera.

Partítröllið fylgist vel með nýjustu straumum og stefnum hvort sem um er að ræða föt, tónlist eða græjur. Það eru 74.5% líkur á því að það eigi iPod, 61% líkur á því að það eigi Fred Perry póló bol og 96% líkur á því að það eigi Adidas skó. Partítröllinu finnst The OC vera skemmtilegur þáttur.

Partítröllið er vinsælt - eða telur sig að minnsta kosti vera það. Þótt margir laðist að því eins og flugur að mykjuhaug eru aðrir sem eru ónæmir fyrir þokka þess og enn aðrir sem hafa jafnvel ofnæmi fyrir því. Það eru þeir sem eru í eldhúspartíinu á meðan partítröllið hristir rassinn og baðar út öngum á dansgólfinu.

Þegar gamaninu slotar er partígríman þó fljótt tekin niður og undan henni kemur viðkvæma blómið sem partítröllið raunverulega er.

Hvaða tröll ert þú?

Jájá.. próf segiði?

Vangaveltur

2005-11-10T11:29:00.000Z

Það er búið að vera svo brjálað að gera hjá mér að mér þykir það ekki sniðugt lengur! Ég vildi að maður gæti stöðvað tímann aðeins og nýtt hann í eitthvað gagnlegt og gaman. Ég þyrfti t.d. nokkra auka daga til að læra fyrir prófin sem nálgast á fljúgandi ferð, smá auka tíma til að hitta vini mína og fjölskyldu og knúsa Jensann minn og Císó og svo keeennski einhverja klukkutíma í hangs og dúllerí! Það væri agalega notalegt. Svo væri ég til í að komast í feitt bað. Ekki það að ég hafi ekki farið í bað lengi heldur hef ég ekki farið í baðIÐ lengi. Heima hjá mömmslu minni og pabba er nefninlega besta bað í heimi með 6 nuddstútum og legusæti og þar getur maður legið klukkutímum saman í froðukómi.
Það versta við þetta allt saman er að líf mitt er ekki að fara að róast á næstunni. Frekar í hina áttina þar sem skólinn heimtar sinn tíma líka. En svo koma jólin eftir þetta allt saman. Ahhhhh jólin. Ég hlakka svo til að ég finn kanil- og grenilykt af öllu sem ég sé. Mig langar að gera konfekt, smákökur og karamellur, skreyta íbúðina hátt og lágt með skrauti, greni og logandi hreindýrum (orð móður minnar), horfa á jólamyndir með mínum kærustu, kjafta við arininn og drekka heitt súkkulaði við kertaljós. Já Jólin sko. Svo verða þetta kannski engin jól þetta árið ef maður ákveður að vinna. Aðfangadagur og gamlárs er á laugardegi svo að það er bara frí á mánudeginum 26.des yfir allar hátíðirnar sem er hræðilegt! Það eru reyndar eins og í öllum aðstæðum bæði kostir og gallar. Gallinn er að sjálfsögðu það að ekkert verður úr jólunum, besta tíma ársins en kosturinn er svo að allri þessari vinnu fylgja peningar sem námsmenn sjá sjaldan of mikið af. Erfið ákvörðun en ég hallast að því að sleppa vinnunni og njóta jólanna þar sem ég hef unnið svolítið á þessari önn og á alveg ofaní mig og á. Já.. ég held það bara..

Skyr

2005-10-31T15:14:00.000Z

Tíminn líður svo hratt. Prófin nálgast með ofurhraða og mér finnst eins og skólinn hafi byrjað í síðustu viku. Það er farið að styttast í Harry Potter myndina, jólin og auðvitað hina miklu reisu í febrúarbyrjun. Ég vona að tíminn haldi sama hraða í gegnum prófatörnina... ágætt.

Það er fullt búið að gerast hjá mér síðustu daga og vikur. Ég er t.d. að reyna að vera dugleg í skólanum svo ég fái ekki magasár enn ein jólin. Það gengur ágætlega og skaðabótarétturinn er alls ekki leiðinlegur... svo er ég búin að vera í endalausu partýstandi og veseni hverja helgi, hvert kvöld, sem ég vona að fari nú bráðlega að taka enda áður en lifrin í mér verður fyrri til.

Sonur minn hann Ciceró er mjög reiður út í mig í augnablikinu því ég fór með hann til dýralæknis og hélt honum meðan hann var sprautaður með nál sem var jafnbreiður og fóturinn á honum. Ég skil þetta ekki.. eru ekki til minni nálar til að nota á svona lítil dýr? Þetta var hræðilegt og hann æpti og veinaði allan tímann á meðan ég hélt honum og því er ég nú hin illa móðir sem kvelur son sinn sér til yndisauka á meðan Jens er æðislegi pabbinn sem gefur honum spínat og epli. Svei.

Ég hef undanfarið stundað pókerleik með samVökufélögum mínum og hef ekkert annað um það að segja en að ég hljóti að vera mjög heppin í ástum.
Ég gær setti ég síðan heimsmet í húsmóðursæðislegheitum með því að föndra jólakort sem ég ætla að senda ykkur grunlausum vinum mínum og fjölskyldu. Um það er heldur ekkert sérstakt að segja annað en að ég ætla ekki að hætta lögfræðinámi og gerast föndurkona. Undirbúið ykkur fyrir ógnvekjandi lím-glimmer-klumpa með jólakveðjum úr Blásölum. :)

Ding dong dei.

Æ hvað lífið er nú gott..

2005-10-20T11:36:00.000Z

Ég er komin heim.. :)

2005-10-04T19:22:00.000Z

Þetta var æðislegt. Of mikið ævintýri til þess að ég geti skrifað um það hér. Áhugasamir eru velkomnir í te, halva, vatnspípu og myndir.
Ég var klukkuð eins og flestir aðrir bloggheimsbúar og ætla því að segja ykkur 5 áður óþekktar staðreyndir um sjálfa mig.

1. Mér finnst flugvélamatur góður. Það er eitthvað við hann sem lætur mér finnast slímugustu eggjakökur gómsætar.

2. Ég hata raðir meira en margt annað. Sérstaklega þegar þær eru óskipulagðar og margir að reyna að troðast fram fyrir með góðum árangri. Ég þoli það ekki og fæ gæsahúð af bræði bara við að skrifa þetta. Vegna þessa leið mér ekki vel á flugvellinum í Íran þar sem ekkert annað en handalögmál giltu í "röðunum" og ef þú veifaðir rétta fólkinu (systursyni ömmu frænda vinar þíns) þá fórstu eins og ekkert væri framhjá 2klst "röð" í vegabréfsskoðun í 40gráðu hita. Já ég er enn örlítið æst yfir þessu.

3. Ég stend sjálfa mig oft að því að vorkenna dýrum meira en fólki í bíómyndum. Ég er almennt viðkvæm fyrir dýrum og hika ekki við að skipta mér af ef mér finnst hegðun eiganda ekki vera dýrinu til hagsbóta. Einu sinni eftir augljóst athæfi lamdi ég mann í höfuðið með dagblaði og spurði hann hvernig honum líkaði það.

4. Ég er rómantísk dramadrottning og tónlist og lýsing hefur mikil áhrif á mig. Ég starfa best við mikla notkun tónlistar og lítillar notkunar ljóss (helst aðeins kerti). Ég hef þjálfað augun til þess að lesa við minnstu ljósglætu sem hlýtur að vera glákuvaldandi. Mér finnst æðislegt að búa til dramatískar aðstæður með tónlist og lýsingu í takt við tilefni. Tónlist hefur það mikil áhrif á mig að get grátið upp úr þurru ef hún er sorgleg.

5. Það má segja að ég sé hrædd við dauðann því ég er logandi hrædd við að missa þá sem mér þykir vænt um eins og fjölskyldu og vini og ég hugsa oft um það. Sennilega of oft. Ég held þetta sé að hluta til vegna nokkurra ótímabærra andláta í fjölskyldunni síðustu ár. Ég verð að passa mig að lifa ekki í hræðslu við að missa því þá missi ég af svo mörgu öðru.

Jæja þá er þetta komið og ég klukka stórvini mína þau Þorbjörgu og Gunnar.
Við Jensi ætlum svo að vera með örlítið teiti um þarnæstu helgi svo takið hana frá! :)

Heillaóskir og ferðalög

2005-09-10T15:46:00.000Z

Litla systir mín hún Brynja sem notar sama skónúmer og ég á 11 ára afmæli í dag og við Jensi óskum henni til hamingju með þennan áfanga. Einnig sendi ég baráttukveðjur til foreldra minna sem á þessari stundu búast við 16 hálfgelgjum í pizzu og twister.

Við Jens (ég er farin að segja þetta grunsamlega oft.. ætli það sé e-ð á milli okkar?) förum út á þriðjudaginn ásamt Daxa verkfræðingi og erum að deyja úr spenningi. Það er allt tilbúið, við eigum bara eftir að troða í bakpokann og kaupa okkur sólarvörn. Mér finnst leiðinlegt að Elín kemst ekki með í Gunnaheimsókn.
Það er sagt að sólarlag við Persaflóann sé guðdómlega fallegt. Það verður gaman að sjá hvort það slái Blásalasólarlagið út sem lætur mig sitja dreymna við gluggann löngum stundum!

2005-09-02T11:40:00.000Z

Datt bara í hug að ykkur þætti gaman að vita það...

2005-09-02T11:37:00.000Z

Ég ætla að þrífa alla íbúðina hátt og lágt í dag en ég kem mér ekki af stað...

Þegar þetta er skrifað er ég með einglyrni.

2005-08-18T12:14:00.000Z

Litla heimilið okkar Jensa er orðið með eindæmum menningarlegt! Fyrir nokkrum vikum fengum við gullfallegt píanó frá 1920 sem afi og amma áttu og ég finn það núna að það er ekkert heimili án píanós. Sérstaklega píanós með sögu eins og okkar en það flæktist um Evrópu í áratug áður en það komst í stofuna til afa og ömmu þar sem pabbi minn lærði á það. Ég hef svo glamrað og seinna spilað á þetta píanó frá því að ég man eftir mér og hef því einnig sett mitt mark á það. Það helsta er án efa það ein nótan var og hefur verið biluð og það fór eitthvað í taugarnar á mér í kringum 5 ára aldurinn svo að ég merkti hana vandlega með því að skera X á hana með borðhníf og krota svo ofaní það með penna. Það vakti mikla lukku. Á jólunum var spilað á þetta píanó fyrir fjölskylduna og á því voru myndir af öllum barnabörnunum frá bleyju upp í stúdent.
Nú stendur þetta píanó í stofunni okkar! Þegar við fengum það var það mjög falskt svo að við létum stilla það (þurfti 3 skipti til), olíubárum viðinn og fórum með eyrnapinnum á nóturnar svo þær yrðu skjannahvítar og það merkilegasta af öllu.. við létum laga nótuna sem er búin að vera biluð í einhverja áratugi. Píanóstillingamaðurinn var ofsahrifinn af því og þá sérstaklega hljómnum í því sem er mjög djúpur og góður og virkar frábærlega hjá okkur í 4m lofthæðinni.
Ekki nóg með það að við höfum fengið píanó heldur voru kunningjahjón mömmu og pabba að flytja út í töluverðan tíma og settu nokkur falleg málverk í pössun til okkar! Eitt þeirra er 2x2m að stærð eða öðru heiti risastórt og kemur frábærlega út á stóra veggnum.
Og já.. svo erum við að fara til Íran eftir mánuð og erum búin að fá bólusetningar og vegabréfsáritunin er í vinnslu og alles!

Það var bara það fyndasta þegar ég og Elín fórum í Smáralind til að taka mynd af mér fyrir áritunina því ég þurfti að vera í kufli og ekki láta sjást í hárið. Fólki fannst þetta mjög undarlegt. Við förum fyrst til Danmerkur að heimsækja hann Gunna okkar og svo til Istanbúl nokkrum dögum seinna og þaðan til Tehran.

Þetta varð bara heljarinnar færsla.. :) Eigum við svo ekki að hittast í eitt djamm vinirnir svona áður en le skúl byrjar..

ps. Elín biður að heilsa frá Spáni.. hún er brennd á öxlunum ;)

sagt með flugmannsrödd

2005-07-19T00:33:00.000Z

Váááááá maður!
Fyrir um klukkutíma síðan var ég á hvolfi í flugvél af tegund Cessna 152 í miðri "lykkju" í 5000feta hæð yfir fjallinu Hengli. Á svipuðum tíma prófuðum við að slökkva á vélinni og láta okkur hrapa og að láta vélina ofrísa (stalla) og æfa svo björgun úr þeim vandræðum. Ef þér verður óglatt í venjulegum rússíbana þá mæli ég ekki með þessu. Erfiðasti hlutinn var að þurfa virkilega að gera eitthvað mjög mikilvægt.. öllu heldur lífsnauðsynlegt.. á hvolfi og á meðan maginn var enn í 5000feta hæð. Ég fékk að stjórna mestan hluta ferðarinnar nema í lykkjunum og ég var eiginlega fegin af fá að sleppa því. ;) Þetta var alveg æðislegt og ég er svo þakklát mínum yndislegu dásamlegu vinum sem bundu peysu um höfuðið á mér, tróðu mér inn í bíl og keyrðu harkalega um götur borgarinnar til að rugla mig, þóttust fara út á ljósum og hlógu að mér alla leiðina þar til þau leiddu mig að og "afblinduðu" loks upp við flugvél á Reykjavíkurflugvelli. Ég er alveg rosalega ánægð með þessa ferð því það eru ekki margir sem fá að fara Loop á venjulegum vélum og svo var þetta bara svakalega gaman. Alveg ótrúlega svakalega. Maginn í mér er ennþá í loftunum fyrir ofan Litlu kaffistofuna. Ofnotkun á lýsingarorðum skrifist á adrenalínvímu.

Þetta var alveg ótrúlega skemmtileg og vel heppnuð afmælisgjöf!
Takk elsku Elín og Egill.. Þið eruð best! :)

Blogg smogg

2005-07-18T00:26:00.000Z

Það er nú aldeilis langt síðan ég hef tjáð mig hér. Ég hef samt gert margt frásagnarvert í sumar sem þið hefðuð áreiðanlega skemmt ykkur konunglega yfir. Ég nenni þó ekki að skrifa neitt um það núna heldur eru þessi orð einungis rituð sem mont á hæsta skala. Ég og Jensinn erum nefninlega á leið til Nýja Sjálands með foreldrum Jensa í heimsókn til Harðar, bróður Jensa, sem hefur búið þarna í nokkur ár. Á leið okkar stoppum við bæði í Singapore og Ástralíu. Ferðin í heild mun taka um 3 vikur og verður við mest af þeim tíma hjá Herði Kiwi á Nýja Sjálandi eða í um 2 vikur. Restin fer í ferðalagið fram og til baka með viðkomu og nokkurra daga stoppi á áðurnefndum stöðum.

Niðurtalning er þegar hafin og ég er orðin gííífurlega spennt þó að enn sé meira en hálft ár í brottför :)

Be there or be..

2005-06-14T13:26:00.000Z

Þá er að koma að því! Rafting á laugardaginn. Farið verður á tveimur bílum, Litla Dreka og Stóra Skrímslinu (Daxi). Planið er að hit the road um hálf átta leytið á fimmtudeginum!

Það var eitthvað verið að tala um það í gær að við myndum kaupa saman í matinn.. Er þá verið að tala um fyrir ÖLL kvöldin eða kannski bara eitt aðalkvöld? Ég væri allavegana til í að hafa eitt nýsjálenskt nautalundakvöld ef ykkur er sama ;) Er ekki bara geggjuð hugmynd að hafa "piparsteik a la sumarbústaðarferð" á laugardaginn eftir raftingið og bara hambó og pylsur og þannig hin kvöldin?
Hverjir taka að sér búðarferð á morgun? (face it.. 8 manns að versla saman virkar ekki), hver kemur með músík og kannski græjur og hver getur komið með actionary og venjuleg spil í... öööh... kapal..!

Með mikilli og titrandi ástarkveðju...
Erna Leggings

Michael Bolton á leiðinni til landsins!

2005-05-27T14:01:00.000Z

Ég fæ alveg gæsahúð af spenningi!!
"WHEN A MAAAAAAAN LOVES A WOMAAAAAAN...."

Nú fer að styttast í raftingferðina og allir eru búnir að borga nema.. Þooooorbjööörg.. og fær hún því slugsaverðlaunin í ár!
- Tobba.. þú hefur sólarhring og svo er það bara borvélin! ;)

Gunni Eyþórs heldur upp á ammlið sitt á morgun sem er einn af stórviðburðum ársins eins og allir vita en þetta árið verður frábrugðið hinum að því leyti að við Elín verðum ekki á svæðinu! Hrikalegt! Skipulagsleysi aldarinnar.. Við verðum á fyllebytteríi í Vestmannaeyjum ásamt VÖKU-fólkinu mínu en sendum mikla áfengis- og dansstrauma. Við bætum ykkur þetta með dansdrykkjumaraþoni í Skagafirði!

ÚJE!

Það er geðveikt að vera búin í prófum..

2005-05-15T14:08:00.000Z

Og ekki verra að fá svona veður daginn eftir!

2005-05-10T21:58:00.000Z

Ef það er eitthvað sem einkennir minn lærdómsstíl þá er það "gulrótarfíknin". Ég verð alltaf að hafa eitthvað skemmtilegt sem bíður mín ef ég þoli við nokkrar klukkustundir af glósum og dómum. Ef ég klára þetta fyrir þennan tíma þá fer ég með Elínu í ísbíltúr o.s.frv.. Ef engin gulrót er til staðar þá get ég alveg eins gleymt öllum árangri vegna eirðarleysis og leiða. Í stúdentsprófunum var það ákveðinn flugleikur og síðustu jól horfði ég á bút af lengdri útgáfu Hringadrottinssögu hvert kvöld. Þetta verður að vera.

Þetta vor er gulrótin alveg sérstaklega góð. Í afmælisgjöf frá Jensa fékk ég nefninlega The complete series með David Attenborough á tugum DVD-diska sem innihalda meðal annars 13 þátta seríuna Life on earth og ég horfi á öll kvöld þessarar prófatarnar.

Þessir þættir eru bara bestir! Þeir eru frá 1979 og David er þarna ungur og hress (ekki það að hann sé það ekki enn í dag) að vesenast óendanlega mikið um lífríkið í þröngum buxum og var einmitt í gærþættinum í dýrindis sundklæðnaði sem ég hló mikið að. En milli þess sem ég hlæ að liðinni tísku þá gapi ég yfir myndunum sem þeir ná og dáist að einlægninni sem mér finnst skína úr augum minns ástsæla Davids. Svo elska ég hvernig hann talar. Ég elska hann. Elska hann, þættina hans og bækurnar.

Ég er að hugsa um að horfa næst á The blue planet sem á að innihalda alveg mögnuð neðansjávarskot.

Jens fær mörg prik fyrir þessa afmælisgjöf!

Le Raftinge

2005-05-04T13:04:00.000Z

Komið hefur í ljós að Þorbjörg getur engan veginn fengið frí í vinnunni sinni 10.-12.júní. Þá er í raun aðeins eitt eftir í stöðunni og það er að fara á fimmtudeginum 16.júní í Skagafjörðinn og leika okkur í bústað, fagna sautjándanum saman daginn eftir og fara svo í rafting á laugardeginum og heim á sunnudeginum.
Við viljum helst fara þegar allir komast svo látið okkur vita hvernig þessi helgi hljómar fyrir ykkur.
Ykkur = Elín, Þorbjörg, Egill, Gunnar (ég veit um mig,Jensa og Daxa)
Ég og Jensi komumst ekki helgina eftir þessa (24.-25.júní) og helgina þar á eftir verður Hróarskelda.

Annars þá verðum við bara að fara seinna í júlí..

Rafting í sumar?

2005-04-27T16:42:00.000Z

Erum við ekki þokkalega að fara í rafting í sumar???

Ég legg til að við söfnum í tvo báta (keppni sko) og pöntum a.s.a.p. svo við fáum nú sumarbústað með potti og alles..

Gleðilegt golf!

2005-04-20T21:08:00.000Z

Æ hvað ég hlakka til sumarsins! Ég get ekki beðið eftir því að finna lykt af nýslegnu grasi, grilluðu kjöti, fara í útilegur með fjölskyldu og vinum, fara í kjól í vinnuna og sjá ofurhressa Íslendinga vappa um á hlírabol og stuttbuxum í 15 gráðu hita. Nú get ég meira að segja bætt einu á þennan lista og það er.. golf..
Já það er rétt! Við Jensi keyptum okkur mergjuð golfsett á Flórída og planið er að hamast á völlunum í sumar og geta rústað pabba í haust!! ;) Erum meira að segja skráð í eitt stykki fjölskyldugolfmót í júlí svo hér dugar engin linkind. Sérstaklega þarf ég að vera dugleg við æfingarnar því ég þyki víst ekki vera með golfið í blóðinu *hósthóst*

Prófin eru nú bara rétt handan við hornið mér til mikillar skelfingar.. hvernig komust þau þangað?? Mér finnst eins og prófið í almennunni hafi verið í síðustu viku. Tíminn er farinn að líða óstjórnlega hratt. En ég tek bara góðan MR-pakka á þetta svona eins og maður var vanur og lofa því svo að þetta komi aldrei fyrir aftur! Næst verð ég með möppu fyrir hvert fag og penna í 5 litum og glósa í hverjum tíma og les vel fyrir hvern dag og.. og... og ..... hversu oft hefur maður sagt þetta! :/

En núna mun ég setjast við skrifborðið og finna eldmóðinn ,sem hingað til hefur verið horfinn mér, hellast yfir mig! Ég hef aldrei verið betri! (sem minnir mig á nýja lagið með Sálinni sem Jensi hatar)
Það er nú ekki eins og þetta sé leiðinlegt efni! Alls ekki.. mér finnst stjórnskipunarrétturinn mjög skemmtilegur.. það er bara þetta eirðarleysi sem hrjáir mig! Mig langar bara að hlaupa út og hrista mig, dansa og öskra um leið og ég sest niður. Þetta gildir líka um sjónvarpsgláp og almenna kyrrstöðu. Þetta hljómar kannski undarlega en svona er reyndin.

Afsakið mig, ég hef verk að vinna..

Perla 24.05.91 - 16.04.05

2005-04-16T12:09:00.000Z

Perlan okkar dó í morgun. Hennar verður sárt saknað en við erum þakklát fyrir að hafa fengið að hafa hana svona lengi hjá okkur.

Það er samt svo skrýtið að ég eigi aldrei eftir að sjá né knúsa hana aftur.

Ég á naggrís sem ilmar eins og lótusblóm

2005-04-14T20:14:00.000Z

Þeir taki til sín sem eiga...

Innflutningspartý

2005-04-04T17:56:00.000Z

Við buðum í formlegt innflutningspartý á laugardaginn og voru flestir okkar bestu vinir á svæðinu þó svo að nokkurra væri sárt saknað. Græna Bollan stóð undir væntingum en var kannski fullsterk miðað við ástandið á mannskapnum þegar líða tók á kvöldið en það jók bara á skemmtunina. Það skal þó tekið fram að aðeins þeir sem voru á staðnum þetta kvöld fá að sjá myndirnar sem teknar voru.. Sjæse! Þær voru margar og rosalegar.

Innflutningsteitavertíðinni er þó ekki lokið því við eigum enn eftir að fá fullt af góðvinum okkar í græna bollu. Þetta var aðeins fyrsta flytjupartýið af nokkrum svo örvæntið eigi. ;)

Ætli ég þurfi ekki að fara að læra.. úff púff..

Blogg frá Flórída

2005-03-27T23:41:00.000Z

Gleðilega páska alle sammen!
Hjá okkur er núna hressilegt þrumuveður sem mér finnst mjög skemmtilegt. Ég vildi að það væru oftar almennileg þrumuveður á Íslandi. Nenni ekki að skrifa mikið en miklar heilsur til allra.. sérstaklega til Ciceró og hins nagdýrsins míns hennar Elínar og auðvitað til Þorbjargar iðjuleysingja,Egils, Gunna og Daxa :)

- Feitt matarboðsparty þegar ég kem heim maður..

og Halldór.. I got the hat and it is very nice... VERY nice.. kveðjur til þín líka úr los þrumos..

Fann vin í eyðimörkinni..

2005-03-15T14:17:00.001Z

Já.. ég er mjög hugmyndarík og frjó manneskja eins og þið vitið og því fannst mér kjörið að taka þátt í nafnasamkeppni Bláfjalla (var reyndar bara í umræðutíma í lögfræði og hafði ekkert betra að gera) . Það átti semsagt að koma með uppástungur að nöfnum á allar 14 lyfturnar í fjöllunum og tillagan varð að hafa einhvert þema.. Ég vissi að nýja lyftan væri í Kóngsgilinu sem allir þekkja sem í Bláfjöll hafa komið og fannst fínt þema að nefna stærstu 3 lyfturnar Kónginn, Drottninguna og Gosann og svo rest bara Tían, Nían... þið skiljið..
Nýja stólalyftan var stærst þannig að hún var Kóngurinn og barnalyftuna nefndi ég Jókerinn því það vantaði fjórtánda spilið. Jæja svo sé ég bara á forsíðu Moggans í síðustu viku "Kóngurinn vígður í dag" og komst þannig að því að hluti af mínum nöfnum hafði verið valinn (þrjár stærstu lyfturnar heita Kóngurinn, Drottningin og Gosinn) og að ég hefði greinilega unnið þessa keppni sem ég tók þátt í einhvern tíma í nóvember. Ég sendi stjórnendum Bláfjalla tölvupóst um þetta mál og þeir óskuðu mér innilega til hamingju! Þetta er allt mjög skrýtið og þeir hafa ekkert haft samband síðan en skv. auglýsingu um keppnina þá á ég nú ekki bara að fá heillaóskaskeyti heldur líka árspassa í Bláfjöll fyrir alla fjölskylduna og úttektir á úttekt ofan í útivistarvörubúðum. Ég ætla bráðlega að hafa samband við þá aftur og gera þeim í leiðinni (þ.e.a.s. EF þeir verða með vandræði) grein fyrir því hvar ég var stödd þegar ég skoðaði auglýsinguna, tók ákvörðun um að taka þátt, valdi þema og skilaði inn tillögu.. já ég var nefninlega í umræðutíma á Lögbergi umvafin hundruðum laganema og lagaprófessorum. Ekki einu sinni reyna þetta strákar!

Ég er búin að búa til svona myndasíðu sem þið getið skoðað HÉR
Þar getiði meðal annars séð myndir sem við tókum í þokunni um daginn og svo bara almennar útsýnismyndir sem og myndir frá Egyptalandi og úr raftingferðinni miklu.

Blásalabúskapur

2005-03-02T20:16:00.000Z

Við erum flutt inn.. fluttum inn síðasta laugardag og erum svooo ánægð. Héldum matarboð fyrir foreldrana á innflutningsdaginn þar sem ég fór algjörlega á kostum í eldhúsinu og eldaði pekingönd með öllu tilheyrandi. Ekki laust við að mamma og tengdó hafi orðið frekar undrandi því ekki hef ég verið mjög nytsamleg við matargerðina heima hjá þeim og þær frekar búist við að fá spagettí og pulsur. Við erum búin að fá fullt af gestum síðan þá og ég, húsmóðirin mikla, er alltaf með heitt á könnunni og Betty í ofninum ef fleiri hafa áhuga.
Það er bara voðalega kósý að vera svona bara tvö ein í fleti enda höfum við varla farið út úr húsi síðan um helgina. Jensi er auðvitað búinn að tengja og festa upp allt sem hægt er að tengja og festa og get ég núna horft á þætti í tölvunni í sjónvarpinu, sjónvarpið í tölvunni og tónlist frá öllum áttum alls staðar. Svo erum við líka komin með þráðlaust net og ég get ekki lýst því hvað það var gott! Það var eins og að sleppa úr margra ára einangrun á eyðieyju.. voðalega er ég háð þessu. Núna sit ég því í sófanum frá langafa og langömmu, hlusta á City of angels diskinn og hef sjónvarpið á mute, horfi út um gluggann og blogga...
Útsýnið hefur ekki valdið okkur vonbrigðum, það er eitt sem er víst. Ég er ábyggilega að horfa á ykkur öll núna! Ég sé flugvélarnar lenda í Keflavíkurflugvelli og ljósin í bænum þar, reykinn úr Bláa lóninu, Hafnarfjörð, Garðabæ, Kópavog, Reykjavík, Seltjarnarnesið, Akranes og Snæfellsnes.. Ég hef líka verið að fylgjast með skipakomum sem er ansi gaman. Það er mjög sérstök tilfinning sem bærist í brjósti mér þegar ég fylgist með þeim hverfa á bak við sjóndeildarhringinn á vit ævintýranna (eða loðnunnar).. en það er kannski bara ég ;)
Það verður allt mjög fallegt hér uppi í ljósaskiptunum. Allt rautt og gult og sjórinn virkar skærblár.. gaman að sjá yfir þetta svæði og sjá Snæfellsjökulinn rauðglóandi í fjarska. Jens tók ansi flottar myndir af því á mánudaginn síðasta sem ég kannski sýni. og svo að ég tali nú ekki um myndirnar sem hann tók þegar það var þoka hjá ykkur á jarðhæð en sólarlag hjá okkur hér á 12.hæð.. það var eitt af því magnaðasta sem ég hef séð. Fyrir ofan skýin alveg eins og í flugvél.

Ég ætlaði nú bara aðeins að láta vita af mér! Ég er ekkert alltof dugleg í þessu bloggveseni og ég held það batni ekki á næstunni því það er allt brjálað að gera. Ég þarf að vinna upp vanrækt nám, næstu 2 helgar alveg upppantaðar í matarboð og innflutningsskrall og svo förum við Jens með fjölskyldunni minni til Flórída eftir rúmar 2 vikur... Ég er ekki að kvarta :)

Stóra skrefið..

2005-02-09T18:18:00.000Z

Nú fer að koma að því.. Við flytjum inn eftir u.þ.b. 2 vikur! Þetta er ansi skrýtið og ógnvekjandi en líka alveg stórskemmtilegt! Ég er að dunda mér núna við að velja þemaliti á baðið og svefnherbergið, skoða diskastell, rauðvínsglös, lampa, feit teppi og kertjastjaka, lýsingu á ganginn og fleira og fleira! Vá maður.. alveg ótrúlegt.. Okkur vantar ekkert svo mikið svosem. Eigum alla stóru hlutina eins og borðstofusett, sófa, þvottavél og sjónvarp og er það að mestum hluta foreldrum mínum að þakka sem hafa verið örlát á gamla húsmuni sína. Foreldrar Jensa gáfu okkur líka þvílíkt flotta afmælisgjöf.. handofið hirðingjateppi frá Íran (öðru nafni "persneskt teppi") sem er alveg rosalega fallegt. Við eigum líka flest rafmagnstæki sem við munum þurfa (kannski ekki við öðru að búast þegar maður er að flytja inn með Jens) svo okkur vantar í raun bara smáhlutina, lampa, kertastjaka, dót á baðið og eldhúsvörurnar. En það safnast nú saman fljótt veit ég..
Ykkur er svo auðvitað boðið í heimsókn þegar stundin kemur og hver veit nema ég haldi eitt stykki ítalskt matarboð með þemalagi fyrir ykkur (þið komið með matinn því ég verð alltaf að spara framvegis) ;)
Vá ég gæti skrifað endalaust en ég hef ekki tíma því ég er að fara á... húsfund.. ÓJÁ.. Ég er að fara á húsfund... magnað..

Ég læt ykkur vita af framvindu mála og svo verður auðvitað nafnasamkeppni á næstunni fyrir greyið nafnlausu íbúðina okkar.

Hún á afmæli í dag....

2005-02-04T14:49:00.000Z

í dag á rassgatið mitt hún Elín afmæli! Við erum orðnar svo gamlar maður... 21 ár!
Til hamingju með það Ella sprella mín! :)

ps. Ég þoli ekki fólk sem snögghemlar í beygjum.. ég ætla að fara að baka köku.

Fjörugir tímar

2005-01-22T14:09:00.000Z

Það hefur verið mikið í gangi hjá mér síðastliðnar vikur.. mikið og skemmtilegt. Nýja íbúðin var einn helsti orsakavaldur þess en auðvitað líka hin eilíflega bið (að mér fannst) eftir einkunn úr almennri lögfræði, sem var kannski ekki alveg jafn skemmtilegt. Gærdagurinn varð óvænt algjört climax fyrir þetta allt þar sem ég fékk úr prófinu uppúr hádegi og skrifaði undir kaupsamning vegna íbúðarinnar kl.15:00. Þvílíkt stress maður. Ég vissi að einkunnin átti að koma um hádegisbil svo ég kíkti á nokkurra mínútna fresti eftir 11:00 og í hvert skipti varð ég svo æst að ég ofandaði og fékk náladofa í kringum munninn... Þessi tími sem leið á meðan að síðan var að hlaðast inn var óbærilegur. Síðar um hádegisbil (og þremur hálf-taugaáföllum síðar) fékk ég Jens til að vera kíkjari og strax í næstu skoðun stökk hann upp af spennu... einkunnin var komin og ég náði.. flaug í gegn! Ég var ein af 55 sem komust inn en fall var 65%. Ég veit líka um fullt af góðu fólki og félaga úr MR sem náðu og því ætti þetta að verða skemmtilegur bekkur.
En já.. nóg af monti í bili! Nú er sumarbústaðurinn um næstu helgi.. Svo að allir viti þá ert þetta ekki sumarbústaðurinn Rambó sem við ætluðum að fara í fyrst þar sem við frestuðum ferðinni og gátum ekki fengið hann aftur. Þessi sumarbústaður (sem er auðvitað betri) er að sjálfsögðu með heitum potti og alles en í staðinn fyrir að rúm séu fyrir alla þá er bara 1 hjónarúm og svo ein koja fyrir 2 og svo risastórt svefnloft fyllt með dýnum sem er ekki verra. Við skipuleggjum svefnstaði bara seinna. en annars er það bara to sleep where you drop.. :) Þessi sumarbústaður er kannski hálftíma frá Laugarvatni í skógi sem heitir Brekkuskógur og er ótrúlega fallegur staður.

Hef ekki meira að segja í bili en takk fyrir mig í gær kæru vinir! Það var mjög gaman ;)

Krakkar mínir..

2005-01-07T13:16:00.000Z

Ég elska ykkur öll..

...annað í fréttum er að við Jensi minn höfum nú keypt okkur íbúð! Hún er ekki niðri í bæ eins og við héldum fyrst þar sem við fundum loks draumaíbúðina í Kópavogi og gátum bara ekki staðist hana. Þetta er svona "penthouse" og er á 12 hæð og stendur hæst allra bygginga á Reykjavíkursvæðinu og því er útsýnið vægast sagt ótrúlegt. Það er parket á allri íbúðinni nema inni á baðherbergi, eldhúsið er mjög fallegt og opið og svo höfum við líka stórar góðar svalir þar sem þeir sem ekki eru lofthræddir geta grillað og legið í sólbaði ;)
Við vitum ekki alveg hvenær við fáum hana afhenta en það verður a.m.k. innan þriggja mánaða og ég hlakka mikið.. mikið til að fá ykkur í matarboð!
Blómvendir vinsamlega afþakkaðir en peningagjafir leggist inn á reikning 0135-26-2279 ;)

Best að fara aftur að vinna..

Gleðileg jól

2004-12-28T13:59:00.000Z

Gleðileg jól elsku vinir mínir og farsælt komandi ár.. takk fyrir allt liðið..
Ég sendi engin jólakort þetta árið frekar en þau fyrri svo þið látið ykkur þetta duga ;)

Sumarbústaðurinn okkar er pantaður 12-17 janúar og það er nóg pláss fyrir góða vini.. það eru 8 rúm, smá svefnloft og svo svefnsófar og dýnur líka.. svo getur Elín bara sofið í pottinum ef þörf er á! Ég og Jens ætlum að fara á miðvikudagskvöldinu og hvílast þar til þið komið á föstudeginum þannig að þið getið mætt hvenær sem er þann dag.. það eru 8 sængur og koddar í bústaðnum og hinir verða að koma með eigið dót.. Fyrstir koma fyrstir fá og því fá Elín, Þorbjörg, Dagur, Gunni, Ég og Jens, Egill og Elín lóa sængurnar og koddana.. hí á ykkur hina!
Að sjálfsögðu þurfa allir að koma með sundföt í pottinn, áfengi og grillmat..
Já þá er það ákveðið og allir komast pottþétt er það ekki???
Hvað varðar gamlárskvöld.. eigum við ekki að hittast vinirnir í smá pörtý? Ég veit ekki hvar.. og ekki hvernig en ég veit það yrði gaman og ekki verra ef við myndum taka aðeins í Singstarið hans Egils!

Einhver með laust húsnæði undir partýhald á gamlárs?? Ef svo er.. let us know hun!

Jólatréssala

2004-12-15T21:05:00.000Z

Ég varð vitni að magnaðri atburðarás á jólatréssölu Reykjavíkur!
Ég kom þarna í sakleysi mínu til þess að kaupa þetta jólatré sem þeir hafa á sölu en því miður voru þar margir fleiri sem höfðu þessa sömu tilætlan og það var mikilll æsingur fyrir framan jólatrésgeymsluna.. Sá duglegi maður er varð fyrstur að kofanum þegar hann opnaði um morguninn (var búinn að bíða þar alla nóttina með svefnpoka og heitt kakó) bjó sig undir að fá tréð, borga fyrir það og ganga glottandi sigurgönguna að bílnum sínum en svo fór nú ekki.. Feitlaginn maður í leðurjakka ruddist fram hjá honum, lamdi hann í öxlina og staðhæfði að hann hefði verið fyrstur og ætti rétt á þessu jólatré og innan skamms voru þeir komnir í hörkuslag um jólatréð... munnvatn, barrgreinar og leðurtægjur skutust um svæðið! Kona kom þá aðvífandi og ætlaði að nota kvenlega nærveru og innsæi til að stöðva óða karlmennina og hóf að ræða rólega við þá um jólaandann og hvað það væri mikilvægt að elska náungann. Allt kom fyrir ekki og leðurmaðurinn lamdi jólatrénu af öllu alefli í magann á henni svo hún flaug nokkra metra og lá máttvana í götunni. Þá var jólatréssölumanninum nóg boðið enda er hann mikill andstæðingur ofbeldis og greip stóra skóflu sem stóð upp við kofann og barði leðurmanninn í hnakkann þannig að hann lympaðist niður. Allir klöppuðu! Duglegi maðurinn fékk jólatréð sitt og þetta andartak var svo þrungið tilfinningum að allur hópurinn byrjaði að syngja.. algjörlega upp úr þurru...þetta var stórkostlegt og meira að segja Björgúlfur felldi tár! (úr gulli að sjálfsögðu)
Svo fóru allir heim og gerðu sig tilbúna til að mæta á morgun að berjast um næsta jólatré.

En svona í alvöru.. Af hverju getur fólk ekki skrifað JólaTRJÁAsala en ekki jólaTRÉSsala..

Smirnoff Helgason

2004-12-07T21:25:00.000Z

Ég og Jens ætlum að drífa okkur í huggulega sumarbústaðaferð einhvern tímann í janúar í alveg æðislegan risabústað með 4 herbergjum, heitum potti,og útsýni yfir Borgarfjörðinn.. og ekki spillir fyrir að við bústaðinn er stórt vatn með árabátum og veseni! Mjööög huggulegt. Við ætlum að taka með okkur góðvini vora Smirnoff og Bjórunni og einn skiptinema frá Mexíkó sem ég hef ekki hitt lengi. Planið er mjög einfalt... sofa.. grilla.. fara í pottinn.. vaða í vatninu og hrinda Jens út úr bátnum í því miðju.. fara aftur í pottinn.. grilla meira... drekka skiptinemann.. og þannig getur þetta haldið áfram! Eina sem okkur vantar er hrúga af góðum vinum til að fylla öll herbergin sem við höfum..

Sjálfboðaliðar hafi samband við yfirsumarbústaðanefnd eða Bjórunni.

ps. bústaðurinn hefur fengið nafnið Eiríkur Birkir Rambó

2004-12-01T16:00:00.000Z

I made a Quiz for you! Take my Quiz! and then Check out the Scoreboard!

jæja þá rennur stund sannleikans upp..

ég mun lemja alla sem fá undir 50.. nema ég þekki þá ekkert auðvitað..

Hrakfarir á snjóbretti

2004-11-26T15:45:00.000Z

Egill á heima í vesturbænum.. á Ásvallagötunni í gulu húsi..

Ég hef alltaf verið frekar hrædd við það að yfirgefa öryggi stólalyftunnar því ég hef verið mjög óheppin við þær aðstæður! Einu sinni þegar ég var að byrja á bretti ætlaði ég að vera geðveikt æðisleg og renna mér fallega úr stólnum og í augnablik virtist það vera að takast þar til að ég tókst skyndilega aftur á loft og sveif áfram með stólalyftunni góðu.. þá hafði ég semsagt fest úlpuna í stólnum og þurfti því að hanga þarna í ríflega korter á meðan að fjallageiturnar sem vinna þarna stöðvuðu lyftuna og voru að reyna að ná mér niður og allir hlógu að mér eins og ég væri Bob Saget. Þetta var hræðilega neyðarlegt og þá sérstaklega þar sem ég var í tíunda bekk og þar að auki mjög hrifin af gaurnum sem var með mér á bretti þann dag og hann hló manna mest. Ég hef án efa litið undarlega út svona hangandi eins og tuska úr stólalyftunni alveg að kafna á hálsmálinu á úlpunni minni, með magann beran, slefandi (út af hálsmálskyrkingunni) og kvartandi með brettið danglandi á löppinni..
Á endanum tókst þeim að ná mér niður með því að klippa hettuna af úlpunni og ég var free at last eftir lengsta korter veraldar.. þá fannst fólki ég ekkert fyndin lengur heldur bara sorgleg.. samband okkar brettamanns þróaðist ekki frekar en ég verð ennþá svolítið stressuð þegar ég yfirgef stólinn ;)

Versta og neyðarlegasta atvikið var samt í fyrra þegar ég var talin bara nokkuð góð á bretti og var að hjálpa einhverju barni í barnalyftunni í Bláfjöllum en tókst á einhvern hátt að detta um sjálfa mig ofarlega í BARNAlyftunni og ég rann aftur á bak og sópaði með mér um tuttugu krökkum... Það er á svona stundum sem maður slær sjálfan sig utanundir.. :/

Eitt af því skemmtilegasta sem ég hef lent í á brettinu var þegar ég var á Akureyri og sveif um brekkurnar með vasadiskóið á fullu og var ekkert að spá í því hvert ég var að fara. Allt í einu hrynur jörðin/snjórinn undan fótum/bretti mér og ég fell niður örugglega 5 metra.. í kafi í lausasnjó og staurblind í sjokki hélt ég samt jafnvægi í nokkur andartök þegar ég hryn aftur niður nokkra metra.. þá rúllaði ég í marga hringi og endaði með snjó á stöðum sem ég vissi ekki einusinni að væru til á mér! Ég hafði semsagt óvart rambað inn á Hengjusvæðið í Hlíðarfjalli sem allt bretta-og skíðafólk fyrir norðan hlýtur að þekkja..
Þetta var alveg geðveikt gaman en ég hefði aldrei þorað þessu ef ég hefði ekki óvart farið í hugsunarleysi mínu!

Svo mun ég heldur aldrei gleyma því þegar ég og Eyþór vinur okkar Ellu fórum með Elínu að kenna henni á bretti.. þetta var ári eftir úlpuatvikið. Elín dettur einhvern veginn úr stólnum þegar hún var að gera sig tilbúna fyrir að yfirgefa hann og ég og Eyþór sjáum ekki annan kost en að henda okkur á eftir henni..
Við liggjum þarna svo öll í brekkunni fyrir neðan svæðið þar sem ætlast er til að maður yfirgefi stólinn og rembumst við að koma okkur í burtu. Stólarnir þeysast framhjá hver á eftir öðrum og við erum á milli umferðar þeirra fram og tilbaka í ágætu skjóli að við héldum. Ég man ekki alveg hvað gerðist næst en á einhvern hátt stendur Eyþór upp og samstundis kemur brjálaður stóll aðvífandi og fer beint í höfuðið á honum! Þetta var algjör viðbjóður því skinnið á enninu á honum bókstaflega sprakk upp og það myndaðist skurður yfir allt ennið,húðin hékk niður fyrir augun, það sást vel í höfuðkúpuna og blóðið fossaði! Þetta var alveg rosalegt og ég og Elín vissum ekkert hvað hafði gerst. Eyþór lyppaðist niður og varð alveg eins og dópaður og heimtaði að við myndum bara halda áfram á bretti eins og ekkert hefði í skorist.. svo leið yfir hann af blóðmissi eða af höfuðhögginu. Við notuðum vettlingana okkar til að halda við sárið og Elín var svo hjá honum á meðan ég brunaði niður í skála til að fá aðstoð. Hann fór svo með sjúkrabíl á spítala og í dag er hann með mjög flott ör yfir allt ennið :)

Ég hef nú aldrei lent í neinu svona rosalegu en eins og ég var að tala um í kommentunum í gær þá var ég mikið í því að stökkva og leika mér á tímabilinu 3-4.bekkur.. þegar það var snjór á Íslandi.. og þá meiddi ég mig oft.. Versta var þegar ég ætlaði að reyna að fara svona hálfgerðan kollhnís í loftinu af palli og það mistókst og ég lenti á hálsinum.. ég hélt í alvöru að ég væri lömuð! Ég fékk svona stuð niður allan hrygginn og lá bara þarna eins og klessa þar til maður á vélsleða náði í mig.. ég tognaði svo illa að ég gat varla hreyft mig í nokkra mánuði :) Þegar ég fór síðan á bretti í Ölpunum í fyrra var þar það allra flottasta stökksvæði sem ég hef séð.. dúndrandi tónlist og æðislegar pípur, pallar og læti.. en ég þorði ekki.. fékk bara illt í bakið af að horfa á þetta.. ;)

jæja.. þetta voru hrakfarir mínar á bretti.. ég kann nú fleiri sögur en nenni ekki að skrifa meira.. Ég ætla bara rétt að vona að það fari að snjóa í fjöllinn svo ég geti farið að lenda í fleiri ævintýrum.

Einbeitingarleysi

2004-11-22T14:45:00.000Z

Það er alveg ótrúlegt hvernig maður getur alltaf fundið sér eitthvað heimskulegt að spá í þegar maður er að læra! Það er eins og heilinn setji í gang svona varnarbúnað við meiri þekkingu.. þetta getur tekið mjög á taugarnar..

Kæri Heili.
Ég veit að ég hef kannski ekki komið vel fram við þig og sært blygðunarkennd þína oft og mörgum sinnum með áfengisdrykkju og FM-tónlist. Ég hef þó snúist til betri vegar að mörgu leyti og ég myndi meta það mjög mikils ef þú myndir hætta að kvelja mig með stöðugum hugsunum um ferðalög, snjóbretti og slúður á meðan ég reyni að læra og að við gætum kannski hjálpast að við að halda einbeitingu í nokkra klukkutíma í senn, Við þurfum nefninlega að ná þessu prófi 21.des næstkomandi til þess að mega læra eitthvað nýtt og skemmtilegt næsta vor! Ef ég þekki þig rétt þá viltu heldur ekki fá orð á þig fyrir heimsku og leti.. eða hvað?

með kveðju og von um góð viðbrögð,
Erna

Jæja.. vonum bara að hann taki vel í þetta kallinn :/

Ég vil líka óska Elínu *BITURLEIKI* til hamingju *grenjgrenjgrenj* með prófalokin *ARRRG* og góðs gengis með verkefnið!

Okey mate?

2004-11-18T22:06:00.000Z

Það styttist í prófin.. hjá ykkur það er. Mitt próf er ekki fyrr en um seint og síðarmeir þannig að þið verðið að vera voðalega góð og sæt við mig þegar þið eruð búin!! Mig hefur t.d. alltaf dreymt um að láta einhvern nudda á mér axlirnar og fikta í hárinu á mér á meðan ég les um lögskýringar.. Það er ekki eins og ég geri aldrei neitt fyrir ykkur krakkar!

Ég hef samt heyrt að lesendahópur þessa bloggs sé farinn að stækka á einhvern undarlegan hátt og ég á nú lesendur úr flestum minnihlutahópum.
því hef ég ákveðið að hafa tvær útgáfur af sama blogginu, sitt á hvoru tungumálinu svo að allir geti lesið! Hitt bloggið er á golfmottan2.blogspot.com

Annars þá hef ég ekki haldið mikilli einbeitingu í námi undanfarið vegna máls sem ég hef leynt ykkur í töluverðan tíma! Ég hef ekki sagt neinu ykkar frá þessu.. (ekki einu sinni Elínu) þannig að þetta ætti að koma ykkur ansi mikið á óvart! (sorry Elín).. Ég vildi bara ekki segja neitt svona in case að þetta myndi allt klúðrast og ég kannski búin að magna upp þvílíka spennu og vesen!
Þetta gæti samt að vissuleyti verið sorglegt og kannski gengur þetta bara alls ekkert upp en allar líkur benda nú til þess að þetta gangi.
En já.. kemur í ljós því ég fæ að vita allt á sunnudag eða mánudag!

Leynigestur

2004-11-10T18:04:00.000Z

Bush vann.. bjóst samt alveg við því! það er gífurleg óánægja með þessi úrslit um allan heim og margar ástæður þar fyrir... en mér stendur allavegana ekki á sama um hversu ótrúlega heimskulegt þetta kosningakerfi þeirra er! Og ég tala nú ekki einu sinni um hvernig þessi þjóð umbreytist öll í einhverja banana þegar kemur að því að kjósa sér leiðtoga, þetta blessaða fólk í mesta lýðræðisríki landsins, týnandi atkvæðum hér og þar og skipandi heri lögfræðinga tilbúna með skjöl og penna.... svona til öryggis ef allt skyldi fara í klúður!

Ég og Elín höfum samt ákveðnar grunsemdir um hvernig á sigri Bush getur staðið...

Svo get ég ekki sofið á næturna útaf skrímslinu honum Degi Bjarnasyni! Ég fæ martraðir um þennan leynigest sem við munum hitta hjá honum á laugardaginn! Ég segi að við förum í verkfall og neitum að mæta í þennan dónagleðskap nema við fáum að vita hver þetta er! Ég er bara einfaldlega ekki byggð fyrir svona spennu skiljiði??
Það hafa strax myndast getgátur um "gestinn".. en eina vísbendingin sem við fengum var að þetta væri einhver sem væri venjulega ekki á Íslandi en þetta kvöld væri undantekning..
Egill hefur giskað á manninn sem samdi Neverending story, Jens er alveg öruggur með það að þetta sé John Kerry , sumir segja Snæbjörn og aðrir Gunni (hann var í Danmörku) en ég hef lúmskan grun um það að þetta sé bara mamma hans því hún er flugfreyja og er eiginlega aldrei á landinu.. svo hlær hann að okkur, rekur okkur burtu og segist ekki geta haldið partý af því að mamma hans sé heima!
Kannski er þetta svo bara einhver ógeðslegur ostur sem hann hefur fundið í skáp.

Ef einhver veit eitthvað meira þá látið mig vita áður en hárlosið verður meira..

Til hamingju með afmælið Þorbjörg!

2004-11-04T12:07:00.000Z

Ég þurfti að fara í svona hálfsárs skoðun hjá tannlækinum mínum í gær og var það mjög stressandi! Þið munið hvað gerðist síðast þegar ég lenti í blóðugum bardaga við tannskotann eins og ég kalla hana... það var hræðilegt! Ég semsagt fer til hennar, sest í stólinn og hálftíma seinna fæ ég reikning upp á 53.000 krónur sem að mestu leyti var skrifaður á fegurðaraðgerð!! Það kom svo í ljós að þetta átti ekki að heita "fegurðaraðgerð" heldur "dramatísk endurbygging á fyllingum því fyrri tannlæknirinn þinn er hálfviti" og þetta kostaði samt 53.000.. Gamli tannlæknirinn minn sem ég var með áður átti semsagt að hafa klúðrað málunum það illilega að það varð að skipta út öllu sem gert hafði verið nokkurntíma á minni ævi.. hmmm.. dýrt klúður það á kostnað foreldra minna! Það sem mér fannst þó merkilegast var að allt þetta.. ÖLL þessi aðgerð til bjargar niðurníddum tönnum mínum tók aðeins 25mín..
Að lokum kom í ljós að þetta var allt saman hið mesta rugl og þessi milljón króna reikningur var heildartala fyrir einhver 5 síðustu skipti hjá henni sem tengdust endajaxlatökunni miklu.
Ég var því viðbúin öllu hinu versta í gær þegar ég fór til hennar enda getur það ekki verið skynsamlegt að vera með tannlækni sem hatar þig og þú ert búin að vera að rífast við og hóta í marga mánuði.. alls ekki skynsamlegt.. Þetta bjargaðist þó alveg þrátt fyrir að hún hafi plokkað ansi harkalega í tennurnar á mér og stöku sinnum runnið með tækin og sargað aðeins í tannholdið og svona.. þetta tók ekki nema u.þ.b. 10 mínútur og ekkert fannst að tönnunum.. það fannst henni þó ekki koma í veg fyrir rukkun uppá 8500 krónur.
Guð minn góður.. það er sagt að tannlæknar séu með hæstu sjálfsmorðstíðni heims en mig grunar að þetta séu alls engin sjálfsmorð heldur hafi þeir verið myrtir af ofsafylltum og snauðum viðskiptavinum með fallegar tennur!

Þetta er alveg agalega leiðinleg og bitur færsla og því bið ég ykkur öll forláts..

Ég vil óska Þorbjörgu innilega til hamingju með afmælið sitt sem var í gær og láta hana vita að við vinir hennar erum mjög fegin þessum atburði því nú fáum við kannski loksins að vera út heilt afmæli á skemmtistað...

Í minningu Potta

2004-11-03T23:36:00.000Z

Í minningu Pottalings.. loðinbolta, kúrukattar, letidýrs og umfram allt frábærs kisa sem ég þekkti frá fæðingu! Ég held að myndin segi allt sem þarf..

Samúð og knús til Ellu og annarra syrgjenda.

NaNoBlogMo

2004-10-21T15:57:00.000Z

Það gleður mig að tilkynna yður að vér höfum eignast nýjan bloggvin! Elín Helga, öðru nafni Spanky, hefur nú hafið skriftir á síðunni kunigund.blogspot.com

Síðan er svona leyndó eins og mín og bara svona hjólhýsapakk eins og þið sem fáið að vita af henni. Hún er stórglæsileg..innanpíkubleik og falleg og því held ég að óhætt sé að búast við miklu!

Nú á ég fullt af bloggvinum.. kann samt ekki að gera svona lista en ég reyni að vinna úr því bráðlega þegar ég er ekki í svona vondu skapi af því að langa færslan mín sem ég skrifaði áðan datt út og er óendurheimtanleg úr viðjum internetskrímslisins og því hefði ég þurft að skrifa allt aftur en ég nennti því ekki.. Stundum hata ég tölvur!
En endilega kíkiði á síðuna hjá Ellu!

Fundur Fundur úlfhundur..

2004-10-17T20:06:00.000Z

Hellú og takk fyrir í gær! Mjög gaman þrátt fyrir mikla þreytu í mér.. ég varð mjög hissa þegar ég leit á klukkuna þegar ég kom heim og hún var hálf fimm! Ég hélt hún væri í mesta lagi tvö ;)

En já nú er komið að því að við þurfum að hefja undirbúning raftingferðarinnar svo við getum valið okkur besta tímann og svona! Við þyrftum líka helst að skella okkur aftur í Jökluna okkar til æfingar.. Ég talaði við raftingbrjálæðingana þar og þeim fannst þetta mjög spennandi og buðu okkur að fá tvær ferðir fyrir eina og veita okkur nánari leiðsögn. Þeir eru mjög góðir gaurar og mundu vel eftir okkur rugludöllunum og sérstaklega Elínu sem réri alltaf í vitlausa átt og okkar frábæra leiðtoga Gunna "Next time I´m going to hit you" Eyþórssyni.

Um næstu helgi verður haldinn fundur um þetta mál heima hjá Degi Bjarnasyni og mun ég þá koma með allar þær upplýsingar sem ég hef aflað.
Þetta verður ekki dýrt! Flugið er um 60.000 og svo er allt svo hræódýrt þarna að 6 daga raftingferð með mat, gistingu , kokki, guideum, og öllu er á um 20.000. Svo þurfum við að borga fyrir rútu upp í fjöllin og fleira smávægilegt auk þess að sniðugt er að kaupa líftryggingu. :/
Nei nei..smá spaug.. áin sem ég held að sé sniðugust fyrir okkur er Marshyangdi sem er stig 4+.. aðeins erfiðari en jökulsá eystri.. Eini munurinn er að það eru fleiri rapids í takt við the green room heldur en hér á Íslandi og mun minna um rólega kafla til hvíldar! But that´s the way we like it right??

Skoðið þessa síðu hér: rafting in nepal
áin sem ég vil heitir Marshyangdi sem er..
"Raging River" in the local dialect aptly describes one of the best whitewater runs in the world

Svo hittumst við bara öll um næstu helgi og ákveðum hvenær líklegast er að allir eigi 100.000 kjéll. ;)

2004-10-13T20:35:00.000Z

*DÆS*
Þið eruð fámennur en kröfuharður og ótrúlega blaðurgjarn leshópur! Ég er nú búin að vera í lærdómskasti um tíma og því hefur ekkert merkilegt gerst sem ég gæti hugsanlega sagt frá hér og ekki viljum við að þetta blogg leggist eins lágt og sum önnur sem setja inn 34 lína færslu um litinn á tannburstanum sínum.. minn er appelsínugulur.. Jæja þá er það afgreitt!

Ég ætla samt að gerast svo djörf og setja inn mjög persónulega vídeóklippu núna þar sem ég er guð tækninnar o.s.frv... Það geri ég einungis þar sem að það vita fáir um þetta blogg og ég kann ágætlega við ykkur öll sem lesið það (auk þess sem ég hef eitthvað á ykkur öll.. svona ef ske kynni)
Vídeóið fengum við sent núna í sumar frá systur pabba sem býr í Svíþjóð og á strákinn Gulla sem er jafnaldri minn. Þetta myndband finnst mér mjög fyndið því ég er svo lík sjálfri mér að það er ótrúlegt þar sem ég aðeins rétt 1 og 1/2 árs gömul þegar það er tekið.. jæja dæmið sjálf!

Skoða myndband af smækkaðri Ernu HÉR

Túristar

2004-10-03T21:23:00.000Z

Í fyrradag sá ég 3 japanska ferðamenn með myndavélar tína sveppi á umferðareyju á Bústaðarveginum.. Sveppirnir voru allir vel þroskaðir, afskræmdir og svartir.

Ný bók frá Túrkmenbashi

2004-09-29T13:06:00.000Z

tekið af mbl.is
Dagskrá ríkissjónvarps Túrkmenistans var rofin í gær til að forseti landsins, Saparmurat Niyazov, gæti lesið ljóð sín í beinni útsendingu.

Forsetinn las 40 ljóð sem birt eru í nýrri bók hans. Líkt og þrjár fyrri ljóðabækur höfundar verður sú fjórða skyldulesning í framhaldsskólum. Hið sama á við þekktasta ritverk hans „Rukhnama“, sem fjallar um rétta breytni. Forsetinn er jafnan nefndur „Túrkmenbashi“, sem þýðir „Faðir allra Túrkmena“. Í júní var efnt til alþjóðlegrar ráðstefnu í höfuðborginni, Ashgabat, sem bar yfirskriftina: „Eilífur mikilfengleiki Saparmurat Túrkmenbashi - Forseti gullaldar Túrkmena.“
...
Mér finnst Turkmenbashi alltaf jafn æðislegur.. Ég minnist þess þegar að hann fékk áhuga á tennis og reistir voru tennisvellir hvar sem þeim mátti koma fyrir í Túrkmenistan og þegar hann lét gera stóra styttu af sjálfum sér úr skíragulli sem stendur á helsta torgi höfuðborgarinnar Ashgabat á snúningspalli. Svo eru auðvitað hálfgerðar helgimyndir af manninum út um allt! Hann er sannkallaður faðir allra Túrkmena.

"Þessi útsending er rofin vegna mikilvægra ástæðna.. Ólafur Ragnar Grímsson mun nú lesa nokkur ljóð sem hann var að semja"
Mér dettur helst í hug hversu vel höfuði Davíðs Oddssonar væri komið fyrir á spjóti ef grísinn hefði svona Turkmenbashi-völd.

og svo ég vitni í goðið sjálft:
"I´m personally against seeing my pictures and statues in the streets but that´s what the people want"
- Saparmurat Niyazov, forseti Túrkmeninstan

2004-09-24T13:32:00.000Z

Nú er ég búin að skoða allar hugmyndirnar vel og átti erfitt með að komast að niðurstöðu um sigurvegara.. Jú Skúli er auðvitað góður kandídat og með óteljandi góðar hugmyndir til þess að klekkja á óvinum sínum en varð eiginlega hálfgeðveikur eftir fyrstu 39 hugmyndirnar(he just kept on going) og missti nokkur stig við það. Eftir að hafa séð glósubunka lagastúlkunnar eye to eye í gær (bókstaflega þar sem hann er svona mannhæðarhár) þá hljómar hugmynd Þorbjargar eins og tónlist í mínum eyrum og einnig finnst mér hugmyndir Daxa mjög áhugaverðar og fæ ég mikla örvun út úr því að hugsa um að halda henni vakandi á nóttunni og lærdómsvana á daginn með píanóglamri. Jens kom líka með góðan punkt í sinni hugmynd sem var að bjóða henni einfaldlega í partýið í kvöld.. það yrði allavega blóðugt..

Eftir mikla íhugun hef ég þó komist að niðurstöðu.. og hér kemur sigurhugmyndin:

Nei, ekki niðurlægja hana. She's not worth it. Gerðu soldið verra sem er sérstaklega í uppáhaldi hjá mér: Ef hún heldur e-n tímann partí, farðu þá á klóið og skeindu þér með öllum tannburstum sem þú finnur! Þá geturðu hlegið í hvert sinn sem stelpan opnar á sér munninn í tímum því þú veist soldið sem enginn annar veit. Af hverju haldiði annars að ég sé immune gagnvart leiðinlegum, niðrandi kommentum frá fólki sem ég hef farið í partí til? Múhahahahaaa!

Dómnefndin óskar Skúla til hamingju með þessa frábæru hugmynd og lofar að vera alltaf vinur hans..

Afmæli Egils og matarboð

2004-09-23T11:33:00.000Z

Jæja krakkar! Hugmyndasamkeppnin gengur mjög vel og ég fæ mikla útrás með því að lesa þær hugmyndir sem borist hafa og þegar hún byrjar að tuða í tímum þá læt ég bara ímyndunaraflið sjá um það að klína tyggjói í hárið á henni, skeina mér á tannburstanum hennar og fleira sem ykkur geðsjúklingunum datt í hug. Mjög gott mál semsagt.

En já tilgangurinn með þessari færslu var semsagt að ÓSKA AGLI VIÐARSSYNI HJARTANLEGA TIL HAMINGJU MEÐ AFMÆLIÐ SITT (við elskum þig öll rauðhærði maður) og tilkynna frekar hið mánaðarlega matarboð sem verður á morgun og verður haldið í þetta sinn heima hjá stórmenninu Degi Bjarnasyni í Garðabæ. Ég mun gefa nánari upplýsingar símleiðis þar sem ég er hrædd um að partýleitandi vandræðaunglingar Garðabæjar rekist á þessa síðu ;)
Ég er búin að láta alla vita sem eiga að koma þannig að hinir geta bara hætt að spá í hvort þeim sé boðið.. >;) Ég, Elín og Dagur höfum boðist til þess að sjá um matseldina og erum við að spá í að hafa ýmist góðgæti á boðstólnum. Allir eiga þó að koma með 1000kr því þetta er svona samskotsmatarboð fátækra námsmanna. Dagur fær þó að sleppa þar sem hann er jú gestgjafinn okkar. Ef það verður einhver afgangur þá kaupi ég bara áfengi og við gerum ljúffenga bollu sem við eigum saman. Áfengi er annars ekki valkostur heldur skylda. Ef þið hafið einhverjar spurningar hringiði þá bara. Og endilega komið með partýdiska og ég mun koma með Trivialið.. (vara ykkur við sko ég er geðv... nei okey.. ég get aldrei neitt í þessu drasli)

ÞEMALAGIÐ í þessu matarboði til heiðurs Agli hefur verið valið og er það að þessu sinni eitt af uppáhaldslögum afmælisbarnsins The never ending story með Limahl og fólk getur undirbúið dansatriði með því að hlusta á lagið HÉR!

Raftingfélagið Ernan kynnir:

2004-09-21T14:16:00.000Z

Mikil og merkileg hugmyndasamkeppni verður haldin dagana 21.- 24.september 2004
á helsta fundarstað félagsins golfmottan.blogspot.com. Hugmyndirnar skulu snúast um aðferðir sem henta myndu vel til þess að klekkja á leiðinlegu lagastúlkunni sem angrar sjálfskipaðan formann félagsins þessa dagana. Engar takmarkanir eru á illsku og óhugnalegheitum. Vegleg verðlaun eru í boði eða 1/2 l af vodka eða kippa af ísköldum bjór auk þess er skálað verður fyrir vinningshafanum oft og mörgum sinnum í matarboði félagsmanna sem verður um helgina til heiðurs afmælisbarninu Agli Viðarssyni. Vinningshafi mun einnig hafa algjöran forgang á klósett með engum undantekningum.

Hugmyndum skal skila með nafni keppanda í COMMENT fyrir kl. 12:00 að hádegi föstudaginn 24.september. Hver einstaklingur má skila inn eins mörgum hugmyndum og geta er til.

Let the games begin..

Leiðilega lagastúlkan

2004-09-20T12:36:00.000Z

Það er stelpa ein með mér í lögfræði sem situr 2 röðum fyrir aftan mig og lítur mjög sakleysislega út með liðað hár, gleraugu og almennt frekar eðlileg. En það er hún sko alls ekki! Hún byrjaði rólega, spurði kennarann einhvers öðru hverju og hlustaði annars bara á hann með miklum áhuga. Svo fór hún smám saman að fjölga spurningunum og að ganga upp að kennaranum í frímínútum til þess að spyrja einhvers nánar. Staðan í dag 2 og hálfri viku frá fyrsta tíma er hræðileg! Þessi beygla þegir aldrei!ALDREI!! Ef kennarinn spyr salinn að einhverju þá öskrar hún svarið að honum af fullum krafti til þess að vera örugglega fyrst með svarið og ekki líður meira en mínúta á milli hennar heimskulegu, óþarfa spurninga! Þetta eru ekki venjulegar spurningar manneskju sem vill virkilega fá að vita eitthvað sem hún ekki skilur heldur eru þessar spurningar hennar til þess að allir viti hvað hún sé æðisleg, gáfuð og stórkostleg! (Sem henni hefur greinilega tekist að sannfæra mig um..) T.d. ef að kennarinn er að tala um að í einstaka tilvikum sé hugsað hvað hinn almenni maður hefði gert og það talið rétt, þá heyrist andartaki síðar nagandi röddu "Svona eins og gert er í skaðabótarétti með Bonus Patrus familias??" (e-ð sem við lærum mun síðar) og það fer hörmungarhrollur um salinn. Svona spurningar koma stanslaust allan tímann aftur og aftur og aftur og það eru allir að verða geðveikir. Verst er samt þegar að einhver annar dirfist að spyrja kennarann að einhverju! Hún lætur sér það lynda á meðan spurningarnar eru á réttri leið (að hennar mati sem er ,þrátt fyrir hennar fullvissu um eigið ágæti, alls ekki alltaf rétt) en eins og t.d. í síðustu viku þegar ein stelpan spurði hvort þetta væri svona þegar eitthvað væri svona.. nenni ekki að finna dæmi.. þá heyrðist enn einu sinni þessi nagandi rödd sem við þekkjum svo vel segja. "ohh.. nei nei nei nei..." á meðan að hin stelpan var að tala!
Í dag er okkur skipt niður í umræðuhópa og við eigum að rökræða við hvort annað um hitt og þetta.. Ég bið til guðs að ég lendi með henni í hóp og þá skal ég sko segja henni hvað mér finnst um hana og þessar spurningar hennar!!

OHHHH ég get ekki beðið!!!

Perla

2004-09-14T20:27:00.000Z

Ég hef áður skrifað um hundinn minn hana Perlu.. Ég sagði frá því þegar hún stökk bæði hálfblind og gigtveik fram af kletti í Heiðmörk til að ná í önd sem var á svamli í vatninu fyrir neðan.. Þá nennti ég reyndar ekki að segja ykkur hvað gerðist eftir það en það fór allt vel miðað við aðstæður. Hún auðvitað sá ekkert hvar hún var og synti í hringi í nokkrar mínútur þar til við Jens komum og öskruðum, flautuðum og klöppuðum (hún er hálfheyrnarlaus orðin líka greyið) í átt að henni svo hún áttaði sig á hvert hún ætti að fara og að lokum kom hún til okkar og uppúr.. frekar ánægð með dagsverkið.
Perla er 13 ára og er vön því að koma sér í ýmis vandræði. Þegar hún var nokkurra mánaða hvolpur var hún að fylgjast með okkur, mér og frændsystkinum mínum, æfa okkur (í óleyfi að sjálfsögðu) í því að kasta með veiðistöng þar sem við vorum í sumarbústað á vestfjörðum. Á enda línunnar var ógnvænlegur spúnn með 3 göddum. Þegar eitt okkar var í miðju kasti stekkur Perla skyndilega upp og gleypir spúninn. Hún kyngdi honum og þetta var sko ekkert grín því hann stakkst allur í litla hvolpahálsinn hennar og ég held að ég hafi grenjað stanslaust í heilt kvöld á meðan pabbi var með hana hjá dýralækni. Þarna var ég 6 ára. Henni var ekki meint af þessu þó hún hafi þurft að vera á sterkum verkjalyfjum og fljótandi fæði í vikur.
Hún Perla er traustur hundur og svaf alltaf uppí hjá mér á nóttunni undantekningarlaust þar til ég eignaðist minn fyrsta kærasta (blessuð sé minning þess fífls) og enn þann dag í dag urrar hún hræðilega á Jens og geltir stundum þegar hann knúsar mig eða kyssir í hennar návist svo afbrýðissöm er hún. Hún hefur alltaf skynjað það þegar mér líður illa og kemur þá og kúrir hjá mér og hlustar stórum augum á öll mín vandamál. Hún kom oft með mér á fótboltaæfingar og sat þá bara og beið þar til ég var búin og trillaði svo með mér aftur heim. Einu sinni var ég tækluð svo illa á vellinum að ég lagðist á grúfu og var e-ð að stynja þar (leikaraskapur hvað??) og næsta sem ég veit er að Perla kemur á fullum hraða urrandi og geltandi með skínandi vígtennur og læti og stekkur á stelpuna sem tæklaði mig og býst til þess að rífa hana í sig. Stelpunni bregður og hún dettur og er haldið í gíslingu af Perlu þar til að húsbóndinn (ég) stend upp og róa þennan litla lífvörð minn niður. Þetta var í fyrsta skipti sem ég sá Perlu svona reiða því hún er svona hundur sem leyfir litlum krökkum að draga sig um á eyrunum og þvíumlíkt sem litlu systur mínar stunduðu. En a dog´s gotta do what a dog´s gotta do.. Það versta sem Perla lenti í var samt sumarið 2000 að mig minnnir þegar við öll stórfjölskyldan vorum að veiða í Blöndu. Þeir sem hafa séð hylina í þeirri á vita hversu óhugnaleg hún getur verið með sína háu kletta og hvítfyssandi strauminn. Perla var semsagt með okkur eins og vanalega í þessari veiði og var bara að vagga um á bökkunum með hinum gamalmennunum í fjölskyldunni. Þá var hún komin með mikla gigt. Allt í einu tekur hún eftir því að pabbi er kominn yfir á hinn bakkann að veiða. Hún fer fram á brúnina til þess að skoða málið og við vitum ekki alveg hvað gerðist annað en það að allt í einu er hún komin ofaní hvínandi hringstrauminn í hylnum fyrir neðan að berjast fyrir lífi sínu. Við fengum öll áfall og hlupum um bakkana og vissum ekkert hvað við áttum að gera því 5 metra hnífbrattir klettar voru fyrir ofan ánna. Perla synti og synti en ekkert gekk og að lokum fór hún að fara meira og meira ofan í vatnið og það var vægast sagt hræðilegt að horfa upp á hundinn sinn bókstaflega að drukkna fyrir framan sig, ylfrandi og fnæsandi og geta ekkert gert. Að lokum ákvað ég að ég gæti þetta ekki ég færi ofaní en var stöðvuð því auðvitað hefði ég bara farið að fljóta þarna um líka. Allir voru farnir að öskra á hvern annan og enginn vissi hvað væri hægt að gera. Þá var hún farin að fljóta í hringi þarna í hylnum og kom ekkert lengur upp til að anda. Þá fékk pabbi nóg og náði í veiðistöng. Hann klifraði eins nálægt og mögulegt var og kastaði þá spúninum yfir Perlu svo hann kræktist í bakinu á henni. Þá var hún orðin alveg meðvitundarlaus þannig að það kom ekki að sök. Hann reyndi að mjaka henni út úr straumnum og það tókst eftir 2 tilraunir og hundurinn okkar sökk ofaní ána og fór niður með henni. En pabbi hafði skipulagt þetta og á hinum bakkanum var vinur pabba og veiðifélagi komin á harðasprett niður eftir ánni. Svona km neðar stökk hann svo niður í ánna og festi sig með því að setja háf (notaður til að ná upp fiskum) á klett í ánni. Svo greip hann Perlu í annan háf þegar hún flaut framhjá. Hinir kallarnir í fjölskyldunni komu til aðstoðar og brátt voru bæði hetjan og Perla komin upp á bakkann. Fyrst lá hún bara þarna alveg í 2 mínútur og ég man ég fann vonleysið stinga mig í hjartað.. svo allt í einu fór hún að hósta upp úr sér vatni og það engu smá og þeegar ég var loksins komin yfir á hinn bakkann (það tók korter að keyra þangað og það var eina leiðin) var hún orðin stálhress. Hún er ótrúleg hún Perla og mér þykir svo vænt um hana og allt hennar vesen.

Í síðustu viku sagði dýralæknirinn okkur að það væri kannski best að fara að svæfa hana bráðlega því hún er nú orðin gömul og veik. Ég trúi ekki að það sé að fara a gerast og finnst það óendanlega leiðinlegt.

nýtt nýtt

2004-09-09T20:39:00.000Z

jæja þá er nýtt tímabil hafið í lífi mínu... blogspot-tímabil!

Ég skar mig geðveikt á puttanum áðan eða nánar útskýrt alveg yfir fingurgóm vísifingurs vinstri handar og því tók þessi annars stutta færsla langan tíma þar sem hann var óvirkur.. góð byrjun ;)

oki

2004-08-11T09:23:00.000Z

Ég varð að gera þetta blogg til þess að geta commentað á síðuna hennar Þorbjargar.. Kannski ég geri e-ð sniðugt með það!